A circulación de trens en Francia volverá á normalidade este luns tras as sabotaxes

A circulación dos trens de alta velocidade (TGV) en Francia, que se viu perturbada por unha serie de sabotaxes coordinadas na madrugada do venres, restableceuse notablemente este sábado, pero a volta á normalidade total non está prevista ata o luns.

A Sociedade Nacional de Ferrocarrís (SNCF) vai garantir o transporte para todos os equipos que participan nos Xogos Olímpicos de París e o persoal acreditado, segundo indica nun comunicado.

O corredor Leste, que cobre as liñas desde París en dirección a Luxemburgo e Estrasburgo, funciona normalmente desde a 6:30 horas. Non ocorre o mesmo cos outros dous, os do Atlántico e do Norte, tamén afectados polos ataques.

No do Norte, que é o que une París con Lille, Londres, Bruxelas, Países Baixos e o norte de Alemaña, funcionan un 70 % dos trens habituais, pero con atrasos de entre unha e dúas horas, porque teñen que se desviar pola liña convencional.

Igualmente están en servizo un 70 % dos TGV das liñas do Atlántico, as que van de París a Bretaña e a outros destinos do suroeste de Francia, como Bordeos, Toulouse ou a fronteira española do País Vasco.

Investigación

A compañía estima que as sabotaxes afectaron 250.000 persoas este venres. As autoridades non deron detalles sobre a marcha das investigacións, coordinadas pola Subdirección Antiterrorista da Policía (SDAT).

Os membros do Goberno interrogados tampouco quixeron especular sobre a pista que máis circula entre os medios sobre unha posible autoría dun grupo de ultraesquerda.