Bruxelas recomenda iniciar negociacións de adhesión con Ucraína, Moldova e Bosnia
Bruxelas recomenda iniciar negociacións de adhesión con Ucraína, Moldova e Bosnia
"Hoxe é un día histórico", di a presidenta do Executivo comunitario, Ursula von der Leyen
![](https://img-g24-crtvg.flumotion.com/prog24/2023/20231108/von-der-leyen-ucraina-moldova-bosnia-081123.png)
A Comisión Europea (CE) deu luz verde ao comezo de negociacións de adhesión con Ucraína, Moldova e Bosnia e Hercegovina, mentres que recomendou que se lle conceda a Xeorxia o status de país candidato.
"Hoxe é un día histórico porque a Comisión recomenda que o Consello inicie negociacións de adhesión con Ucraína e Moldova", dixo a presidenta do Executivo comunitario, Ursula von der Leyen, en conferencia de prensa.
Engadiu, con respecto a Bosnia e Hercegovina, que a Comisión recomenda a apertura de negociacións de adhesión á UE "unha vez que se alcance o grao necesario de cumprimento dos criterios de membresía".
Sobre Xeorxia, á vista dos resultados obtidos, a CE recomenda ao Consello que conceda a Xeorxia o estatuto de país candidato, quedando entendido que adoptará unha serie de medidas.
O Executivo comunitario presentou hoxe os informes sobre o progreso dos dez países con aspiracións a integrarse na UE.
Von der Leyen dixo que aínda que Ucraína segue enfrontándose a "tremendas dificultades e traxedias" provocadas pola guerra de agresión de Rusia, "os ucraínos están a reformar profundamente o seu país, mesmo mentres loitan nunha guerra que é existencial para eles".
O país levou a cabo "máis do 90 %" dos pasos que a CE lle pediu o ano pasado cando recomendou que se convertese en candidato, e os principais avances logrounos na reforma da xustiza, o programa anticorrupción, a loita contra o branqueo de capitais, a limitación da influencia dos oligarcas sobre a vida pública, a nova lei de medios de comunicación ou o trato das minorías nacionais.
"O resto de reformas xa están en marcha", celebrou Von der Leyen, quen recomendou ademais que o Consello (os Estados membros) adopte un marco de negociación unha vez que Ucraína levase a cabo as reformas en curso, algo sobre o que informará a CE en marzo do ano que vén.
En calquera caso, deixou claro que os líderes da UE poderían tomar xa no seu próximo cumio, en decembro, a "decisión política" de abrir as negociacións para a entrada de Ucraína se aceptan a recomendación da Comisión.
"O traballo pode empezar inmediatamente, é moi técnico", asegurou, e lembrou que Ucraína está en camiño de concluír as reformas que lle faltan e que en marzo a Comisión informará do seu progreso.
Sobre Moldova, Von der Leyen indicou que non se enfronta a unha guerra pero que sofre os efectos da que se libra en Ucraína, así como os "constantes esforzos de desestabilización contra a súa democracia.
A pesar diso, asegurou que o país levou acabo "significativos" esforzos en reformas, como na área da xudicatura, a corrupción ou o crime organizado, e realizou cambios lexislativos; con todo, a CE informará en marzo próximo sobre os seus avances nas cuestións pendentes.
Polo que respecta a Bosnia e Hercegovina, a política alemá recoñeceu diferentes "pasos positivos" a nivel político e legal, pero expresou "preocupación" pola lexislación anticonstitucional adoptada pola República Srpska, que conforma o país xunto ao ente común de musulmáns e croatas.
"A porta está aberta de par a par para dar a benvida a Bosnia e Hercegovina ás conversacións de adhesión", dixo en calquera caso Von der Leyen, á vez que a animou a completar todas as reformas solicitadas.
Sobre Xeorxia, considerou que o estatuto de candidato á adhesión é "un gran paso adiante" e "recoñece o impresionante anhelo da abafadora maioría do pobo de Xeorxia de unirse á Unión Europea".
A guerra "atroz" de Rusia en Ucraína supuxo un "enorme impulso" no desexo do país agredido, de Moldova e os Balcáns Occidentais de pertencer á UE, que se reflicte no "ímpeto" das reformas acometidas en todos eles, remarcou Von der Leyen, que instou a aproveitar esa enerxía para terminar o "moito traballo que queda por diante".