Ucraína utiliza por primeira vez mísiles británicos de longo alcance en territorio ruso

Ucraína utilizou por primeira vez os mísiles de longo alcance Storm Shadow, fornecidos polo Reino Unido, segundo informaron este mércores medios británicos.

Os restos dun dos mísiles atopáronse na rexión rusa de Kursk, fronteiriza con Ucraína, segundo publicou unha canle militar rusa en Telegram, con fotografías que o identificaban como un dos artefactos británicos, segundo o diario Financial Times.

Segundo informou The Guardian, o Reino Unido deu o visto e prace a Ucraína para o ataque con estes mísiles como resposta á despregadura de 10.000 militares norcoreanos na fronteira de Rusia.

O reportado uso dos Storm Shadow en Rusia sucede un día despois de que Moscova asegurase que mísiles americanos de longo alcance foran lanzados no seu territorio.

A Axencia EFE púxose en contacto cun portavoz do Ministerio británico de Defensa, que non confirmou nin desmentiu a noticia: "Neste momento, non imos comentar, pero informarémoslles cando haxa novidades".

O presidente ruso, Vladímir Putin, aprobou este martes unha nova doutrina que permite respostas con armamento nuclear ante ataques convencionais que ameacen a soberanía de Rusia e Bielorrusia.

Pola súa banda, Downing Street -oficina do primeiro ministro británico- tampouco se expresou de forma oficial ao respecto. En liña coa súa política habitual, negouse a comentar calquera cambio na política sobre permitir a Kiev o uso de mísiles de longo alcance en Rusia.

O uso dos mísiles Storm Shadows por parte de Ucraína e dos mísiles Scalp equivalentes de Francia discutiuse en conversacións informais entre funcionarios occidentais á marxe do cumio do G20 en Río de Janeiro esta semana, segundo indicaron fontes presentes nas conversacións ao Financial Times.