Milei proponlle a Meloni crear unha "alianza de nacións" contra a tiranía e pola liberdade

O presidente da Arxentina propúxolle este mércores á primeira ministra italiana crear unha "alianza de nacións unidas contra a tiranía" e a favor da "liberdade dos pobos". "Fomos elixidos pola nosa coraxe" e "imos prevalecer", dixo Milei nunha comparecencia conxunta na Casa Rosada, sede do Executivo arxentino, na que non se aceptaron preguntas dos xornalistas, e onde tamén afirmou que "Occidente está baixo un manto de tenebroso".

Milei e Meloni, ambos dirixentes da extrema dereita, coincidiron na súa visión política e prometeron traballar unidos para "afrontar os desafíos dos nosos tempos". O arxentino suxeriu “unha alianza de nacións libres en contra da tiranía e a miseria”, encabezada pola Arxentina e Italia, xunto a outros países que comparten “os seus valores”.

Milei considerou que el e Meloni foron elixidos para abordar o problema inflacionario da Arxentina, no seu caso, e a inmigración no da italiana.

“Como os dous sabemos ben, facelo non é gratuíto. Fomos e somos castigados polo establishment polas nosas accións e opinións, porque eles prefiren administrar a decadencia antes que asumir o risco de construír as solucións. Nós imos soportar porque a longo prazo imos prevalecer”, asegurou Milei.

O mandatario considerou que o seu obxectivo é que os cidadáns se “sintan orgullosos de ser arxentinos e italianos” e dar progreso ás xeracións futuras. “Estou entusiasmado polo futuro de colaboración que lle depara ás nosas nacións”, concluíu o xefe de Estado arxentino.

Meloni ofrece axuda para a loita contra o narcotráfico

A primeira ministra italiana ofreceulle ao presidente arxentino axuda para a loita contra o narcotráfico e a criminalidade no país suramericano.

"Estamos determinados a loitar contra o narcotráfico, a corrupción, o lavado de diñeiro, a infiltración do sistema económico e social e o tráfico de persoas. Estamos orgullosos como Italia de ofrecer a forza e a solidez da nosa experiencia", afirmou Meloni

A primeira ministra  italiana agradeceu a Milei a "cálida recepción" e remarcou que os "puntos de vista en común son moitos", ao destacar as súas posturas sobre os conflitos en Ucraína e en Oriente Próximo e sobre a crise política en Venezuela.

Tamén anunciou que, durante a reunión que mantiveron este mércores en Bos Aires, decidiron traballar sobre tres eixes: a colaboración política, a loita contra o crime organizado e a cuestión comercial e investimentos.

Ao final do seu discurso, a mandataria italiana, que realiza a primeira visita oficial á Arxentina desde que asumiu o cargo en 2022, pronunciou unhas palabras en español: "Italia e A Arxentina son nacións irmás e aínda teñen moito camiño por percorrer xuntas". Ademais, describiu a Milei como "un home valente" e "un amigo de Italia".