O Goberno de Meloni aproba un decreto para blindar os seus centros de inmigrantes en Albania

O Goberno italiano de Giorgia Meloni aprobou este luns un decreto para establecer por lei a lista de "países seguros" de onde proceden os inmigrantes e blindar así os seus controvertidos centros de reclusión en Albania.

A estratexia consiste en blindar a lista de países seguros, é dicir, dos que un inmigrante non ten por que escapar, con este tipo de decretos con forza de lei que se usan momentos de "necesidade ou urxencia", tendo que ser revalidados polo Parlamento no prazo de 60 días.

Ata a data esa lista estaba recollida nun "decreto interministerial", un acto de valor meramente administrativo.

Meloni reacciona así á decisión da Xustiza italiana de baleirar o centro de retención en Albania, onde permanecían doce inmigrantes de Exipto e Bangladesh, e obrigar ao seu traslado a Italia, o que indignou o Executivo.

"Isto converte nunha norma primaria (...) para ofrecer a aplicación dunha lei de interpretación inequívoca, ao noso xuízo. Dígoo con gran respecto pola maxistratura", dixo o ministro do Interior, Matteo Piantedosi.

No centro da cuestión está a apertura nas localidades albanesas de Shengjin e Gjader, alén do mar Adriático, de dúas instalacións -acordadas co primeiro ministro albanés Edi Rama- para recluír os inmigrantes que chegan a Italia e alixeirar así a presión na súa rede de acollida.

O pasado mércores chegaron os 16 primeiros inmigrantes -de Exipto e Bangladesh- a bordo do buque militar Libra, pero 4 deles tiveron que ser devoltos inmediatamente a Italia, dous porque eran menores e outros dous por considerarse "vulnerables".

Con todo, o venres o Tribunal de Roma non validou a retención dos doce inmigrantes restantes e ordenou o seu regreso a Italia, o que provocou un forte enfrontamento entre o Goberno e os xuíces.

A clave do debate está na consideración de "países seguros", pois o acordo con Albania establece que só poidan ser enviados aqueles inmigrantes que procedan de estados de onde non haxa razóns fundadas para escapar.

Italia considera seguros un total de 22 países de orixe migratoria e entre estes, desde o pasado maio, figuran Exipto e Bangladesh.

Doutra banda, o Goberno de Meloni foi denunciado este luns ao Tribunal de Contas polo opositor Movemento 5 Estrelas (M5S) polo gasto de "inxentes" fondos públicos no envío de inmigrantes aos seus polémicos centros en Albania.