Un centenar de xogadoras pide á FIFA romper o patrocinio da petroleira saudita Aramco

Un grupo de 106 futbolistas profesionais de 24 países enviou unha carta ao presidente da FIFA, Gianni Infantino, na que lle reclaman que rompa o acordo de patrocinio con Aramco, a compañía petroleira estatal de Arabia Saudita, por ser un país que “pisa os dereitos das mulleres” e do colectivo homosexual.

Na carta, á que tivo acceso EFE, as asinantes consideran que unha empresa como Aramco, propiedade dun réxime como o saudita que “criminaliza as persoas LBGTQ+ e oprime sistematicamente” as mulleres, “non ten dereito a patrocinar o deporte rei”. 

O acordo de patrocinio con Aramco é unha ofensa ao fútbol feminino", está apoiada por futbolistas que militan en ligas como as de Estados Unidos, Inglaterra, Italia, Alemaña, Australia ou Países Baixos. Entre elas, destacan as capitás das seleccións de Italia, Elena Linari; Canadá, Jessie Fleming, e Croacia, Doris Bacic. Tamén está a estadounidense Becky Sauerbrunn, excapitá da súa selección e internacional en 217 ocasións, e a afgá Khalida Popal, quen tamén luciu no seu día o brazalete do combinado do seu país, un dos que máis perseguen ás mulleres desde que gobernan os talibán.

Na lista, só hai unha futbolista española, a centrocamista Maitane López, que milita no NY Gotham de Estados Unidos, mentres que da liga F a única representante é a dianteira finlandesa da Real Sociedade Sanni Franssi.