O si gaña no referendo moldovo sobre o ingreso na UE a falta do voto exterior

O si a incluír o ingreso na Unión Europea como obxectivo nacional na Constitución de Moldova impúxose co 50,39 % dos votos, segundo os resultados preliminares ofrecidos hoxe pola Comisión Electoral Central (CEC) desa antiga república soviética.

A CEC indicou que se trata de resultados que corresponden ao 99,41 % de votos emitidos, á falta de completar o escrutinio do voto o estranxeiro.

Segundo os últimos datos, 742.335 cidadáns moldavos pronunciáronse a favor da opción europeísta, mentres que 734.571, ou o 49,61 % dos participantes na consulta manifestáronse en contra.

Debido a que falta por escrutar só o 0,59 por cento dos votos é moi improbable que se produza un cambio de última hora.

A CEC indicou que os resultados definitivos do referendo deben ser confirmados polo Tribunal Constitucional.

O si deulle a volta ao resultado durante as últimas horas despois de que a presidenta moldova Maia Sandu denunciara o domingo á noite a fraude nunha clara acusación a grupos próximos a Rusia.

"Temos probas e información de que un grupo criminal se dispoñía a comprar 300.000 votos. Isto é unha fraude sen precedentes cuxo obxectivo é comprometer a democracia. O seu obxectivo é sementar o medo e o pánico na sociedade", dixo Sandu nunha brevísima comparecencia ante os medios.

A xornada electoral escenificou a clara división na antiga república soviética entre os que apoian o ingreso na UE, falantes de romanés, mocidade e diáspora, e aqueles que se opoñen á ruptura con Rusia, que inclúe os rusófonos, os nostálxicos e os máis adultos.

O referendo coincidiu coas eleccións presidenciais, nas que Sandu gañou, pero non con maioría absoluta, polo que deberá enfrontarse o mes próximo ao candidato do Kremlin Alexandr Stoinanoglo.

A man negra do Kremlin

Sandu subliñou na súa intervención postelectoral: "Hoxe, do mesmo xeito que os últimos meses, a liberdade e a democracia en Moldova foron obxecto dun ataque sen parangón", segundo informou o portal moldovo Newsmaker.

"Grupos criminais, asociados con forzas estranxeiras, atacaron o noso país con mentiras e propaganda (...). Non deixaremos de defender a liberdade e a democracia. Esperaremos os resultados definitivos e volveremos con solucións", engadiu.

A presidenta referíase sen citalos ao Kremlin e ao prófugo oligarca Ilon Shor, ao que a Fiscalía moldova acusou en vésperas da votación de crear desde Moscova un esquema fraudulento para a compra duns 130.000 votos con 15 millóns de dólares depositados en bancos rusos.

Segundo outras fontes, Rusia dedicaría 100 millóns de dólares a boicotear o referendo para incluír no preámbulo da Constitución a aspiración dos moldovos a integrarse no bloque europeo.

Durante as últimas semanas, tanto a UE como os Estados Unidos denunciaron numerosos intentos por parte de Moscova de desestabilizar a situación en Moldova con vistas ao referendo europeísta, polo que aprobaron novos paquetes de sancións contra Moscova e os seus acólitos.

Moldova comparte fronteira con Ucraína, polo que a guerra tivo un grande impacto na economía nacional ante a chegada de máis dun millón de refuxiados, dos que máis de 120.000 seguen no país, segundo informou ACNUR.

Á caída do nivel de vida contribuíu tamén, desde que Sandu chegara ao poder en 2020, a pandemia e a guerra enerxética con Rusia, que disparou a inflación.

Boicot dos candidatos prorrusos

Aínda que tanto Stoianoglo, exfiscal xeral, coma o terceiro candidato en discordia Renato Usatii proclamaron que non se opoñían á integración europea, finalmente boicotearon o referendo, do mesmo xeito que os comunistas moldovos.

Stoianoglo argumentou que non votou na consulta popular “en sinal de protesta” pola incapacidade das autoridades de explicar as implicacións xurídicas da inclusión no preámbulo da Constitución da aspiración dos moldovos a ingresaren na UE.

Sen mencionalo, ambos os dous apelaron ao voto do medo en alusión a que a entrada na UE, que axudou a Moldova a reforzar as súas forzas armadas ante a ameaza rusa, sexa un primeiro paso para unha futura adhesión á OTAN.

O expresidente Igor Dodon, estreito aliado do Kremlin cuxo partido apoiou a Stoianoglo, foi máis aló e tachou abertamente o referendo de “ilegal” e “anticonstitucional”. 

Sandu amplía a súa vantaxe sobre Staianoglo nas presidenciais co 98,29 % escrutado

A presidenta moldova e candidata á reelección, Maia Sandu, obtén o 41,92 % dos votos nos comicios do domingo e amplía a súa vantaxe a máis de 15 puntos sobre o seu principal rival, o prorruso Alexandr Stoianoglo, con quen se medirá en segunda volta o próximo 3 de novembro, tras o escrutinio do 98,29 % dos votos emitidos, segundo a Comisión Electoral Central de Moldavia.

Stoianoglo, exfiscal xeral da república, consegue o 26,31 % dos votos, mentres en terceiro lugar sitúase Renato Usatii, co 13,74 %, seguido de Irina Vlah (5,45 %) e Victoria Furtuna (4,51 %).

"Votei porque son os moldavos os que deben determinar o seu destino e non as mentiras ou o diñeiro sucio. Saian votar, o voto é a súa elección de como vai vivir mañá", dixo Sandu o domingo ao emitir o seu sufraxio nun liceo de Chisinau.

Mentres, Stoianoglo afirmou que votara por unha Moldavia "moderna, pacífica e próspera" e prometeu realizar a súa primeira visita á rexión separatista de Transnistria se gaña as eleccións.

Rusia di que os resultados das votacións en Moldova presentan "anomalías"

Rusia declarou este luns que os resultados dos comicios presidenciais e o referendo sobre o ingreso na Unión Europea celebrados o domingo en Moldavia presentan "anomalías" e suscitan "moitas preguntas".

Nos resultados das votacións en Moldova obsérvanse "anomalías" polo aumento dos votos a favor de (a presidenta moldava, Maia) Sandu e a integración europea", dixo o portavoz do Kremlin, Dmitri Peskov, na súa conferencia de prensa telefónica diaria.

Peskov aludiu así ao cambio dos resultados das votacións co correr do escrutinio, que ampliou a vantaxe de Sandu sobre a súa máis próximo perseguidor, o prorruso Alexandr Stoianoglo, e deulle a volta a favor do si no referendo sobre o ingreso de Moldova na UE.

"Os indicadores que vemos hoxe, que estamos a seguir, e a dinámica dos seus cambios, por suposto, expoñen moitas preguntas", subliñou.

O portavoz do Kremlin agregou que é "difícil de explicar o ritmo de incremento mecánico dos votos a favor de Sandu e a favor daqueles participantes no referendo que defenden a orientación cara á Unión Europea".

"Calquera observador que teña a máis mínima comprensión da esencia dos procesos políticos pode detectar estas anomalías co aumento destes votos", insistiu.

Peskov pediu a Sandu que presente probas da inxerencia estranxeira nos procesos electorais, que denunciara nunha breve comparecencia de prensa.

Tras o comezo do escrutinio, que daba unha clara vitoria aos adversarios de ingreso de Moldavia á Unión Europea, Sandu denunciou fraude.

O portavoz do Kremlin indicou que se trata dunha "acusación bastante grave", polo que "algunhas probas deberían presentarse ao público".