A Coruña e Ourense son as que acumularon máis casos de covid nos últimos días
A Coruña e Ourense son as que acumularon máis casos de covid nos últimos días
Allariz é o concello de toda Galicia con maior incidencia acumulada de coronavirus
O concello de Oleiros presenta a peor evolución da área coruñesa
Un aumento de casos que por agora non se reflicte nos hospitais
Unha ducia de concellos galegos son os que rexistran con máis casos. Aparecen as sete cidades e outros como Allariz, Oleiros, Cambre, Vilagarcía ou Tui. Se poñemos o foco nos que teñen a maior incidencia acumulada, chama a atención o caso de Allariz, con 346 casos por cada 100 mil habitantes. O segundo con maior incidencia é o de Ourense con 70, e detrás estaría Oleiros, con algo máis de 50. Eses son os tres concellos que presentan os niveis máis altos.
Oleiros supera os cincuenta casos activos. É o municipio da área metropolitana da Coruña cunha maior incidencia acumulada a sete días, por riba dos 50 casos por cada cen mil habitantes. Na última semana, as probas diagnósticas detectaron dezanove positivos en coronavirus.
Hai 20 persoas infectadas con coronavirus no concello de Cambre, que roza os 50 casos de incidencia acumulada.
Na cidade da Coruña, os 81 positivos diagnosticados na última semana elevan a cifra de infeccións en curso ata as 129. Son as evolucións máis preocupantes da área sanitaria coruñesa, que acumula o 25 % dos casos activos de toda Galicia.
A hospitalización está en niveis moi baixos se os comparamos con etapas anteriores. Con case 1.200 casos activos, en Galicia temos 36 persoas en planta e 10 en coidados intensivos.
As áreas da Coruña e Ourense son as que teñen máis persoas ingresadas. Chama a atención tamén o caso de Ferrol, que ten tres persoas en coidados intensivos. E outro dato destacado: en toda a provincia de Pontevedra non hai ningunha persoa en coidados intensivos. Na cidade do Lérez non hai ninguén hospitalizado, nin en UCI nin en planta.
