A Eurocámara avala prohibir a venda de coches de gasolina e diésel en 2035

O Parlamento Europeo votou este martes a favor de prohibir en 2035 a venda de vehículos de gasolina e diésel e, como paso previo, avalou o obxectivo de reducir á metade, para 2030, as emisións de dióxido de carbono (CO2) para turismos e furgonetas novos.

En concreto, a nova norma aprobada fixa, en base aos niveis rexistrados en 2021, a meta de rebaixar en 2030 as emisións dos turismos de venda nova nun 55 %, mentres que, no caso das furgonetas, a redución establecida é do 50 %.

Tras este período, a partir de 2035, a lei prevé que todos os vehículos que se vendan na UE sexan de cero emisións contaminantes, aínda que, antes de que entre en vigor, o texto terá que ser aprobado formalmente polos Estados membro da UE, reunidos no Consello.

Estes novos obxectivos forman parte do acordo alcanzado entre os negociadores do Parlamento Europeo e os gobernos dos países da UE (representados no Consello) para reformar o regulamento comunitario sobre emisións de CO2 en vehículos, partindo dunha proposta inicial da Comisión Europea.

Con 340 votos a favor, 279 en contra e 21 abstencións, o pleno da Eurocámara avalou esta nova lexislación que, iso si, contou co rexeitamento do Partido Popular Europeo, o grupo maioritario do pleno.

Entre outras cousas, o novo texto tamén reaxusta a porcentaxe de vendas de vehículos de baixas ou cero emisións que a UE esixe aos fabricantes de coches para que poidan acollerse a incentivos económicos da Comisión.

Entre 2025 e 2029, será necesario vender un 25 % de turismos de baixas ou cero emisións sobre o total de vendas dun fabricante para seguir cobrando estas recompensas, mentres que, polo que respecta ás furgonetas, a proporción será do 17 %. A partir de 2030, o novo regulamento prevé a supresión dos incentivos.

O vicepresidente da Comisión Europea e responsable do Pacto Verde, Frans Timmermans, eloxiou o conxunto da reforma e, durante o debate celebrado no Parlamento, afirmou que a lei atopa o "equilibrio perfecto entre os intereses da industria, o clima e dos traballadores".

Timmermans remarcou que o camiño cara ao obxectivo de emisións cero para 2035 debe fundamentarse nunha aposta polo vehículo eléctrico, por encima doutras vías alternativas.

"Ten que haber emisións cero no tubo de escape. Se o sector (automobilístico) pode construír motores de combustión interna con emisións cero, pois perfecto, que o fagan. Pero agora todo o mundo está a apostar pola electrificación, porque é a maneira máis eficiente de lograr emisións cero", afirmou.

Neste sentido, expuxo a viraxe cara ao vehículo eléctrico que, segundo dixo, están a dar as industrias automobilísticas da China, os Estados Unidos e a India, e alertou que será necesario "competir con eles", a fin de non entregar esta "industria esencial a estranxeiros".

"E se é así temos que investir en transformar a industria do automóbil europea para que os vehículos eléctricos se vendan no mundo enteiro, e por iso debemos redobrar esforzos construíndo infraestruturas de recarga por todas partes", apuntou.

Ademais, Timmermans defendeu que, "en poucos anos", comprar un coche eléctrico será máis barato que comprar un convencional con motor de combustión, algo que, ao seu xuízo, "dará opcións ao consumidor" e fomentará o acceso alcanzable a estes modelos.