A Eurocámara pide que a UE recoñeza o dereito ao aborto seguro e legal

O Parlamento Europeo urxiu este xoves os países da Unión Europea a que inclúan na Carta dos Dereitos Fundamentais o dereito a un aborto seguro e legal e o acceso "libre, informado, pleno e universal" á saúde e aos dereitos sexuais e reprodutivos.

A resolución saíu adiante por 336 votos a favor, 163 en contra e 39 abstencións, co apoio dos grupos socialdemócrata, liberal, verde, da esquerda e unha fracción dos populares europeos, mentres que o resto deste grupo se abstivo ou votou en contra e a ultradereita e os conservadores expresaron o seu rexeitamento frontal.

Entre os eurodeputados españois, só o PP, Vox e dous dos sete eurodeputados de Ciudadanos votaron en contra. O texto, non vinculante, pide aos Estados membros da UE que reformen os tratados da UE para que a Carta de Dereitos Fundamentais pase a incluír no seu artigo 3 o dereito de toda persoa: "Á autonomía física e a un acceso libre, informado, pleno e universal á saúde e aos dereitos sexuais e reprodutivos, e tamén a todos os servizos sanitarios conexos, incluído o acceso a un aborto seguro e legal, sen discriminación".

A reforma dos tratados require a unanimidade dos vinte e sete países da UE, algo improbable para un asunto como o acceso a un aborto seguro e legal, xa que regulalo é unha competencia dos Estados membros e en cada un deles faise de forma diferente.

A Eurocámara incide na súa resolución en que os dereitos sexuais e reprodutivos "son dereitos humanos fundamentais que deben protexerse e mellorarse", á vez que condena "todos os intentos regresivos de restrinxir ou eliminar" os dereitos alcanzados ata o de agora ou a intimidación a quen traballa para protexer este dereito.

O texto urxe os Gobernos europeos, con mencións especiais a Polonia e Malta, onde este dereito está máis restrinxido, a que garantan o acceso a unha atención ao aborto segura, legal e gratuíta, a servizos e material de asistencia sanitaria prenatal e materna, á planificación familiar voluntaria, a métodos anticonceptivos, a servizos adaptados aos mozos e á prevención, o tratamento, a atención e o apoio ante o VIH, sen discriminación.