A exministra Maroto afirma que o seu único contacto con De Aldama foi para derivalo a Turespaña
Víctor De Aldama propuxera un proxecto de reactivación turística tras a pandemia da COVID-19
Turespaña afirma que o proxecto non se realizou finalmente
A exministra Reyes Maroto explicou este mércores no Senado que o seu "único contacto" co empresario Víctor de Aldama, investigado no caso Koldo, foi contestarlle ás mensaxes nos que propoñía un concerto musical e derivalo a Turespaña para facer a citada proposta.
A ministra de Industria, Comercio e Turismo entre 2018 e 2023 e actual voceira do PSOE no concello de Madrid explicouno así ao responder á senadora María Caballero, a primeira en interrogala durante a súa comparecencia na comisión de investigación do caso Koldo na Cámara Alta.
"O único contacto que eu tiven co señor Aldama circunscríbese a este proxecto que derivo ao director de Turespaña", afirmou Maroto, despois de indicar que non lembra máis relación con De Aldama.
Maroto explicou que a súa relación con De Aldama foi "moi puntual" e consistiu en que tras o confinamento pola pandemia da COVID-19 el propuxo un proxecto de reactivación turística e entón ela contestoulle para derivalo a Turespaña.
Ese proxecto, que consistía nun concerto musical en Madrid, non saíu adiante, segundo trasladaron desde Turespaña.
