A Fiscalía pide suspender a entrada de Griñán en prisión

A Fiscalía pediu novos informes médicos que permitan á forense realizar un estudo "máis preciso" sobre a procedencia do ingreso en prisión de José Antonio Griñán e solicita que o expresidente andaluz non entre no cárcere mentres tanto.

No seu escrito elevado este pasado mércores á Sección Primeira da Audiencia de Sevilla, os fiscais delegados en Sevilla da Fiscalía Especial contra a Corrupción e a Criminalidade Organizada sinalan que "á vista do informe emitido polo Instituto de Medicina Legal (IML) de Sevilla de data 3 de xaneiro de 2023 conforme ao cal, tendo en conta a proximidade do diagnóstico de Griñán e o feito de que o tratamento non se iniciou, a médica forense, ante a necesidade de facer unha análise preditiva da evolución da enfermidade, conclúe "a non conveniencia do seu ingreso en Centro Penal ata que confirmen a remisión, no seu caso, da súa patoloxía oncolóxica os Servizos de Uroloxía e de Oncoloxía Radioterápica", e que procede solicitar tales informes que permitan á forense evacuar un informe máis preciso sobre a procedencia do seu ingreso en prisión, que deberá suspenderse entrementres.  

Ademais, avisan da "necesidade de que, unha vez recibida a información solicitada e emitido novo informe polo IML, se solicite o informe dos servizos médicos penais do Centro de Sevilla, tal e como" xa interesaban no seu informe do 22 de novembro de 2022.

O expresidente da Xunta de Andalucía foi condenado a cumprir unha pena de prisión de seis anos e dous días por malversación no mecanismo de financiamento dos expedientes de regulación de emprego (ERE) fraudulentos.