A Garda Civil requisa correos electrónicos en Red.es sobre os contratos que afectan a Begoña Gómez
A Garda Civil requisa correos electrónicos en Red.es sobre os contratos que afectan a Begoña Gómez
Tras varias horas nas oficinas, levaron copias de discos duros e arquivos de material informático
![](https://img-g24-crtvg.flumotion.com/prog24/2024/20240606/BegonaGomez.png)
A Garda Civil solicitou na empresa pública Red.es correos electrónicos relacionados cos contratos á empresa de Juan Carlos Barrabés Innova Next, apoiada en dúas cartas de Begoña Gómez, esposa do presidente do Goberno Pedro Sánchez, segundo adiantou El Mundo e confirmaron a EFE fontes próximas á investigación.
A Unidade Central Operativa (UCO) da Garda Civil presentouse o pasado mércores na sede de Red.es por orde da Fiscalía Europea en busca dos correos electrónicos relacionados coas contratacións ao empresario Juan Carlos Barrabés, segundo a información que publica El Mundo.
De acordo co rotativo, esta é a segunda intervención da UCO en Red.es en relación aos contratos desta sociedade pública con Barrabés, que recomendou a Begoña Gómez para a creación dun máster da Universidade Complutense.
O empresario, presidente do grupo Barrabés e administrador de Innova Next ata 2022, está citado en calidade de testemuña este venres 7 de xuño, aínda que a súa declaración está pendente dun informe médico tras alegar problemas de saúde.
O xuíz do Xulgado de Instrución Número 41 de Madrid citou a declarar en calidade de investigada a Begoña Gómez, esposa do presidente do Goberno Pedro Sánchez, o venres 5 de xullo na causa aberta por presuntos delitos de corrupción no sector privado e tráfico de influencias.
Segundo o Tribunal Superior de Xustiza de Madrid, o xuíz Juan Carlos Peinado citou a Gómez no marco das dilixencias previas 1146/2024, centradas nunha serie de contratos públicos adxudicados a empresas de Juan Carlos Barrabés, profesor do máster da cátedra da Universidade Complutense que ela codirixía.