A OMS aclara que a morte dun paciente en México non é atribuíble á gripe aviaria

Un portavoz da Organización Mundial da Saúde (OMS) aclarou este venres que o recente falecemento dun paciente nun hospital de México non é atribuíble á gripe aviaria H5N2, senón a causas "multifactoriais" ao padecer outras doenzas e enfermidades. "É importante indicar que a morte foi multifactorial, non atribuíble ao virus H5N2", reiterou o portavoz da OMS Christian Lindmeier en conferencia de prensa.

A fonte oficial lembrou que o paciente chegou ao hospital tras sufrir síntomas durante semanas, faleceu o mesmo día en que foi examinado no centro sanitario (24 de abril) e tras iso realizáronse probas na que deu positivo polo virus H5N2. É o primeiro caso deste virus frecuente en aves rexistrado en seres humanos, aínda que outros subtipos de gripe aviaria, como o H5N1, foron diagnosticados en persoas de varios países durante as dúas últimas décadas (preto de 900 casos, a metade deles mortais).

O portavoz da OMS subliñou que a investigación do caso está actualmente en curso, pero non confirmou se esta conduciría a unha reavaliación da situación global da gripe aviaria (polo de agora a organización considera que o risco sanitario desta enfermidade é baixo, a pesar dos crecentes brotes en aves e mamíferos).

A OMS informou do caso en México o mércores 5 de xuño, aínda que ao día seguinte o Goberno mexicano negou relación directa entre o falecemento do paciente e a gripe aviaria, acusando o organismo sanitario de emitir un comunicado "bastante malo" en palabras do secretario de Saúde Jorge Alcocer.

"Podo sinalar que o comunicado que fixo a Organización Mundial da Saúde é bastante malo, xa que de entrada fala dun caso fatal, cousa que non foi así, morreu por outra causa e sen que se ditaminara, e só de maneira marxinal di que o risco neste caso é baixo", declarou o secretario de Saúde, Jorge Alcocer.