A pandemia avanza en boa parte de Europa onde medran as restricións

Esta noite vivíronse disturbios en Róterdam. Seguiron ás protestas contra as restricións nos Países Baixos. Deixaron máis de media ducia de feridos e unha vintena de detidos.

Esta sábado están convocadas varias manifestacións en Austria, o país europeo á cabeza na implementación de limitacións contra a covid. Ten confinados os non vacinados e a partir do luns, e como mínimo por vinte días, tamén deberán quedar na casa os demais. Só abrirán as farmacias e as tendas de alimentación.

"As universidades pechan e toda a miña docencia pasa a ser en liña. En dous anos apenas din dous meses de clases presenciais. É desesperante e esgotador", asegura o galego Jesús Millán, profesor universitario en Innsbruck.

Austria rexistra mil contaxios por cen mil habitantes á semana e ten varios hospitais ao límite. As autoridades acordaron a vacinación obrigatoria a partir de febreiro. Arestora, ten a pauta completa o 65% da poboación, unha das cifras máis baixas de Europa Occidental.

"Os antivacinas aquí teñen as súas raíces e apoios desde partidos da ultradereita populista, o Partido da Liberdade, pasando polos antroposofistas, os conspiranóicos... Unha parte da poboación non só non se inmuniza senón que tamén fai proselitismo en contra das vacinas", engade.

A pandemia tamén está rexistrando marcas en Alemaña que, ante resistencia de parte da poboación a vacinarse, teme unha quinta vaga. Andan por riba dos 60.000 contaxios nun día e hai hospitais próximos ao límite.

No estado de Saxonia, o máis afectado, decretouse un peche parcial da vida pública para toda a poboación. A partir do luns e durante tres semanas, suspéndense as actividades culturais, deportivas e de ocio. Pechan bares, discotecas e mercados de Nadal e os restaurantes só abren con horarios reducidos e para vacinados.

O luns entra en vigor unha lei de protección sanitaria que esixe o certificado de vacinación ou un test negativo diario no traballo e no transporte público.