A Sareb terá que arranxar os pisos da Privada Moderna, en Vigo, que levaban anos abandonados

Os veciños da rúa Privada Moderna de Vigo dormen un pouco máis tranquilos. A xustiza deulles a razón logo de anos aturando presións para que marcharan e o abandono da Sareb, propietaria dos pisos.

O Tribunal Superior de Xustiza de Galicia apoia aos veciños desta rúa no barrio do Calvario, e a Sareb, a sociedade que xestiona os activos procedentes da reestruturación bancaria, renuncia a recorrer a sentenza.

Anos de loita en que moitos marcharon, fartos de ver como os edificios sufrían o abandono e a falta de mantemento. Só permanecen habitadas seis das corenta e dúas vivendas que foron construídas hai case un século.

Veciños como Carmen, que hai dous meses ten que durmir fora da casa en que naceu o seu marido, ou Mariano, que lembra con nostalxia os tempos en que a Privada Moderna era un bulir continuo de rapaces xogando.

Agora só desexa que as vivendas sexan arranxadas e destinadas para alugueiro social. Foron anos de acoso, e de reclamar unhas obras de conservación e mantemento que confían en que se fagan agora.