A sentenza polas violacións do caso Pelicot dictarase este xoves con penas de ata 20 anos
A sentenza polas violacións do caso Pelicot dictarase este xoves con penas de ata 20 anos
Son 51 os acusados polas agresións sexuais que Gisèle Pelicot sufriu durante unha década en Francia
Foi drogada e violada en múltiples ocasións polo seu exmarido, Dominique Pelicot, que convidaba a outros homes a abusar dela tamén
Retrato de Dominique Pelicot, principal acusado polas violacións á súa muller, Gisèle Policot. ZZIIGG vía REUTERS
O tribunal de Aviñón, ao sueste de Francia, ditará este xoves sentenza no histórico macroxuízo sobre as violacións baixo submisión química a Gisèle Pelicot, con penas que poden chegar ata os 20 anos para cada un dos 51 acusados.
A Fiscalía pediu o pasado 27 de novembro ata 650 anos de prisión polo total dos delitos, que inclúen tanto violacións como agresións sexuais contra a vítima, de 72 anos, convertida nun símbolo feminista mundial por decidir que o xuízo fose público "para que a vergoña cambie de bando".
A maior pena solicitada, de 20 anos (a máxima contemplada pola lei en Francia), é para o seu exmarido e cerebro do plan, Dominique Pelicot, de 72 anos, quen desde o inicio do proceso recoñeceu todos os feitos e asegurou que a súa fantasía era "someter unha muller insubmisa".
El abusou dela e púxoa en perigo de morte de 2011 a 2020, drogándoa e convidando a outros homes a que a violasen.
Outro dos acusados, Jean-Pierre Maréchal, admitiu no xuízo os delitos aínda que xamais tocou a Gisèle Pelicot, senón que replicou coa súa propia esposa os métodos do principal acusado, quen tamén foi violada baixo os efectos dos ansiolíticos por ambos os homes.
A menor pena solicitada pola Fiscalía, de 4 anos, é para outro home que só está acusado de agresión sexual, sen cargos de violación.
O resto, con idades comprendidas dos 27 aos 74 anos, enfróntanse a solicitudes de condenas que van dos 10 aos 20 anos de cárcere por violación agravada.
"Haberá un antes e un despois", asegurou durante as vistas a fiscal do tribunal penal de Aviñón Laure Chabaud, sabedora da importancia deste xuízo. Por iso, pediu unha "concienciación real e profunda sobre a noción de consentimento" para os acusados e tamén para a sociedade.
De feito, en Francia o Código penal define a violación como "calquera acto de penetración sexual de calquera tipo ou calquera acto buco-xenital cometido contra outra persoa" mediante "violencia, obriga, ameaza ou sorpresa".
A noción de consentimento non aparece no ordenamento xurídico francés e para que se tipifique o delito de violación debe haber penetración.
Por iso mesmo as estratexias de varias defensas baseáronse en tratar de elaborar argumentos enrevesados sobre que prácticas sexuais desenvolveron os seus acusados.
As probas de todos os delitos están nos miles de vídeos e fotos que realizou o propio violador confeso Dominique Pelicot.
Os feitos que se xulgan ocorreron entre 2011 e 2020, primeiro na rexión de París e, a partir de 2013, na casa á que se mudaron os Pelicot ao xubilarse, situada en Mazan, unha vila de 6.000 habitantes preto de Aviñón.
Dominique Pelicot contactaba a decenas de homes na Internet e convidábaos ao seu domicilio tras drogar á súa muller con grandes doses de ansiolíticos, que a deixaban inconsciente e preto do coma, segundo os expertos médicos que declararon ao comezo do xuízo.
O principal acusado rexistraba esas violacións, descubertas en 2020 pola policía, despois de detelo tras ser descuberto gravando baixo as saias dunhas mulleres nun supermercado de Carpentras.
Dominique Pelicot está acusado tamén noutros dous casos de violencia de xénero, un pola violación e o asasinato dunha muller en 1991 e o outro por unha tentativa de violación en 1999.
