A UCO rexistra a Deputación de Badaxoz no marco da investigación sobre o irmán de Pedro Sánchez
A UCO rexistra a Deputación de Badaxoz no marco da investigación sobre o irmán de Pedro Sánchez
O rexistro enmárcase no procedemento que se segue contra David Sánchez Pérez-Castejón por delitos contra a Facenda pública, tráfico de influencias, prevaricación e malversación
Tras preto de cinco horas no interior da sede da Deputación, os axentes abandonaron o edificio portando unha maleta e polo menos dúas mochilas.
![Imaxe de arquivo da Deputación de Badaxoz. Arquivo Europa Press](https://img-g24-crtvg.flumotion.com/prog24/2024/20240710/fotonoticia_20240710110343_1920.jpg)
Axentes da Unidade Central Operativa (UCO) da Garda Civil entraron as 9 deste mércores na Deputación de Badaxoz para realizar un rexistro no marco do proceso que se segue contra o irmán de Pedro Sánchez.
Fontes da Deputación de Badaxoz confirmaron a Europa Press este rexistro, ordenado pola titular do Xulgado de Instrución número 3 de Badaxoz, no procedemento que se segue contra David Sánchez Pérez-Castejón por delitos contra a Facenda pública, tráfico de influencias, prevaricación e malversación.
O deputado de Cultura da Deputación de Badaxoz Ricardo Cabezas mostrou o seu "respecto á xustiza" no marco do proceso xudicial aberto e confiou en que "se resolva canto antes esta situación", tras o que reiterou que non ten máis información que a que apareceu en medios.
Cabe lembrar que o sindicato Manos Limpias presentou esta denuncia contra David Sánchez Pérez-Castejón por delitos contra a Facenda pública, tráfico de influencias, prevaricación e malversación.
Nestas pescudas non está presente David Azagra –nomee artístico de David Sánchez Pérez-Castejón-, aínda que este si se atopa nas dependencias da institución provincial, apuntaron a EFE fontes da investigación e da Deputación.
Este xulgado de Badaxoz investiga a David Sánchez e o presidente desta institución provincial Miguel Ángel Gallardo por presuntos delitos de malversación, prevaricación e tráfico de influencias.
A dita apertura de dilixencias tamén é polos presuntos delitos contra a Administración Pública e a Facenda Pública. Segundo fontes xurídicas, a xuíza podería levantar o segredo de sumario ao longo da mañá.
A investigación foi iniciada por mor dunha denuncia presentada polo autodenominado sindicato Manos Limpias contra David Sánchez, Miguel Ángel Gallardo e o xefe do Servizo de Apoio Xurídico e Inspección da área de Recursos Humanos da Deputación, Alejandro Cardenal.
Manos Limpias presentou a dita denuncia ao poñer en dúbida tanto o proceso de contratación de David Sánchez, quen tamén é director da Banda Sinfónica Orquestra de Cámara da Deputación, como o desenvolvemento da súa xornada laboral diaria e mais a forma de tributación do seu salario.
Á súa vez, a Deputación Provincial, a petición do PP, creou unha Comisión Interna de Estudo para analizar tanto a contratación como as funcións de David Sánchez.
Esta comisión, con maioría do PSOE, determinou que a contratación se realizou con “transparencia, publicidade e respecto á normativa” e que David Sánchez tributa "a través do Imposto da Renda de non Residentes", pois ten a súa residencia en Portugal.
Con todo, o PP pacense, que votou en contra do informe, sostén que a documentación achegada na devandita comisión non permite constatar que “cumprise o seu horario diario”, pois “os altos cargos e a alta dirección non están obrigados a fichar, pero si que están suxeitos ao exame do cumprimento de obxectivos”.
Neste sentido, o PP considera que David Sánchez foi contratado sen que se lle marcasen obxectivos dentro das súas funcións nin que estes estivesen suxeitos a control por parte da institución provincial.