A UE comprométese a seguir apoiando a Kíiv "tan intensamente como sexa necesario"

Os líderes da Unión Europea manifestaron este xoves o seu compromiso para seguir apoiando a Ucraína "tan intensamente como sexa necesario", e tamén convidaron o Banco Europeo de Investimentos a adaptar a súa política de préstamos á industria da defensa.

"A Unión Europea está decidida a seguir proporcionando a Ucraína e a súa poboación todo o apoio político, financeiro, económico, humanitario, militar e diplomático necesario durante o tempo que sexa necesario e tan intensamente como cumpra", declararon nunhas conclusións adoptadas no cumio que os Vinte e sete celebran en Bruxelas.

Recalcaron que Rusia non debe gañar a guerra despois de dous anos de invasión e dez da anexión ilegal de Crimea e Sebastopol. "Ucraína necesita urxentemente sistemas de defensa aérea, munición e mísiles. Neste momento crítico, a Unión Europea e os Estados membros acelerarán e intensificarán a entrega de toda a asistencia militar necesaria", sinalaron.

Os mandatarios, así mesmo, celebraron a aprobación do fondo específico de apoio militar a Ucraína de 5.000 millóns de euros para este ano por parte dos ministros de Exteriores esta semana, que se insire no Fondo Europeo de Apoio á Paz (FEAP) mediante o que os Estados membros estiveron cofinanciando a entrega de equipos letais e non letais a Ucraína.

Os líderes pediron, do mesmo xeito, “traballar” no oitavo tramo de 500 millóns de euros no marco do FEAP para cofinanciar o envío de armamento a Ucraína que bloquea Hungría desde hai meses. Suavizouse así unha versión precedente das conclusións en que se solicitaba aprobar canto antes ese paquete de apoio. Os líderes, ademais, "revisaron o progreso sobre os seguintes pasos concretos encamiñados a dirixir os beneficios extraordinarios provenientes dos activos inmobilizados de Rusia en beneficio de Ucraína, incluída a posibilidade de financiar apoio militar".

Nese sentido, pediron aos seus ministros avanzar o traballo sobre a recente proposta do xefe da diplomacia comunitaria Josep Borrell e da Comisión Europea para utilizar os beneficios extraordinarios dos activos rusos conxelados polas sancións, que ascenden a uns 3.000 millóns de euros anuais, en financiar armas e munición para ese país principalmente.

Nunha conferencia de prensa tras a primeira xornada do cumio este xoves, a presidenta da Comisión Europea Ursula von der Leyen indicou que dixera aos líderes que, se traballan rápido, espera que se poidan desembolsar xa os primeiros 1.000 millóns para o 1 de xullo. Os Vinte e sete tamén celebraron a adopción do décimo terceiro paquete de sancións, pediron fortalecer as medidas restritivas contra Rusia e chamaron a evitar que se sorteen as sancións.

Nese contexto, solicitaron ao xefe da diplomacia comunitaria e á Comisión prepararen máis sancións contra Belarús, Corea do Norte e Irán. Sobre Irán, igualmente, manifestaron a súa preocupación polas informacións de que o país pode transferir mísiles balísticos e tecnoloxía relacionada a Rusia. "Se Irán fixese iso, a Unión Europea está preparada para responder rapidamente e en coordinación con socios internacionais, tamén con novas e significativas medidas restritivas contra Irán", afirmaron.

Ademais, rexeitaron e dixeron que "nunca recoñecerán" as eleccións presidenciais "ilegais" que Rusia organizou a semana pasada nos territorios ucraínos ocupados nin os seus resultados. Os Vinte e sete engadiron que a UE "está comprometida con incrementar a súa preparación e capacidades xerais de defensa para satisfacer as súas necesidades e ambición no contexto de crecentes ameazas e desafíos de seguridade".

Tamén subliñaron o seu compromiso con reducir as súas dependencias estratéxicas e ampliar as súas capacidades, e aseveraron que a base tecnolóxica e industrial de defensa europea debería reforzarse en toda a Unión. Para mellorar o acceso da industria militar europea ao financiamento, os mandatarios convidaron a Comisión Europea e os seus ministros a "exploraren todas as opcións para mobilizar financiamento" e informarlles no cume de xuño.

Os líderes tamén instaron hoxe a “adoptar rapidamente” os marcos legais para abrir oficialmente as negociacións de adhesión con Ucraína e Moldova e “avanzar cos traballos sen demora”.