A UE concede a Ucraína e Moldova o status de países candidatos

Os xefes de Estado e Goberno da Unión Europea (UE) concederon este xoves a Ucraína e Moldova o status de países candidatos a entrar no club comunitario, despois de que a Comisión Europea (CE) realizase unha recomendación nese sentido a semana pasada.

Os líderes dos Vinte e sete deron, no cumio que celebran en Bruxelas, o primeiro paso na adhesión deses dous países, un proceso que pode ser reversible se non cumpren as reformas que lles esixiu a CE en materia de independencia xudicial, loita contra a corrupción e crime organizado ou á hora de aplicar a lei que limita o poder dos oligarcas.

O Consello Europeo decidiu recoñecer a "perspectiva europea" de Xeorxia pero non lle outorgou aínda o estatuto de país candidato.

O presidente Ucraíno, Volodímir Zelenski, conectouse en directo cos líderes europeos tras adoptar a súa decisión. Eloxiou "sinceramente" a decisión dos Vinte e sete de outorgar o estatuto de candidato ao seu país, algo que cualificou de "momento único e histórico" nas relacións entre a UE e Ucraína.

A de hoxe foi unha decisión que "nos reforza a todos. A Moldova e Ucraína, ante a agresión de Rusia e á UE, porque se mostra unha vez máis ao mundo que está unida e forte ante ameazas estranxeiras", dixo a presidenta da Comisión Europea, Ursula Von der Leyen, nunha conferencia de prensa minutos despois do acordo.

A concesión da candidatura a Ucraína e Moldova estaba garantida antes do inicio do cumio, pero os líderes tardaron máis tempo do inicialmente previsto en aprobala porque o visto e prace estivo precedido dun debate máis amplo sobre o futuro do proceso de ampliación dos Balcáns Occidentais, segundo diversas fontes diplomáticas.

Unha discusión que se desencadeou tras a frustración que expresaron publicamente os líderes de Albania, Macedonia do Norte, Serbia e Kósovo, ao termo da xuntanza que a UE celebrou o xoves á mañá cos Balcáns Occidentais, que culminou sen un desbloqueo ao seu proceso de adhesión.

"O que está a pasar agora é un serio problema e un duro golpe á credibilidade da UE. Estamos a perder un tempo prezado do que non dispoñemos", afirmou o primeiro ministro de Macedonia do Norte, Dimitar Kovacevski, en alusión ao veto que mantén Bulgaria para empezar as negociacións de adhesión con Skopje e Tirana.

Tras esas queixas, Austria e Eslovenia, principalmente, presionaron para explicitar con máis claridade nas conclusións do cumio europeo a dispoñibilidade da UE para acoller aos Balcáns.

Este dato pode concretarse nunha alusión explícita a poder conceder a Bosnia e Hercegovina o estatuto de país candidato se cumpre as condicións de Bruxelas en materia de Estado de Dereito, segundo outras fontes. 

E é que a aceptación das candidaturas ucraína e moldova prodúcese apenas tres meses despois de que solicitase a súa adhesión, adiantando a outros países que ven como o seu acceso segue bloqueado.

Ante un proceso de adhesión tedioso, os líderes europeos discutiron hoxe por primeira vez a idea do presidente francés, Emmanuel Macron, de crear unha Comunidade Política Europea cos países do continente que comparten os valores europeos.

"Debemos pensar dunha forma rápida de estabilizar a nosa veciñanza", recalcou Macron, que comparou a súa proposta xeopolítica como o espazo que comparten os veciños que "viven na mesma rúa, pero en diferentes casas".