A UE, un paso máis preto de prohibir a venda de coches a gasolina no 2035

O Parlamento Europeo apoiou este mércores a proposta da Comisión Europea para que en 2035 deixen de venderse coches e furgonetas con motor de combustión na Unión Europea, iniciativa que aínda ten que negociarse cos Estados membros da UE.

A data de 2035 para que só se poidan comercializar vehículos novos de cero emisións foi aprobada por 339 votos a favor, 249 en contra e 24 abstencións na sesión plenaria deste mércores da Eurocámara en Estrasburgo (Francia).

De cara á negociación final cos países, os eurodeputados apoiaron unha senda de redución de emisións das frotas de utilitarios do 15 % en 2025 en relación con 2021, do 55 % en 2030 e do 100 % en 2035, mentres que a redución que se esixe ás furgonetas ao final da década é do 50 %.

Espérase que os países da UE debatan a súa posición sobre a descarbonización da automoción no consello de ministros de Medio que se celebrará o próximo 29 de xuño en Luxemburgo.

O transporte é un dos sectores que máis CO₂ libera na UE e só os coches producen o 12 % do total de emisións de gases de efecto invernadoiro.

A normativa final sairá da negociación que emprendan Parlamento, Consello e Comisión a partir do segundo semestre do ano, cando a presidencia do Consello da UE recaia sobre República Checa, país de orixe da marca de coches Skoda.

O voto sobre o dióxido de carbono dos vehículos é só unha pequena parte do colosal paquete lexislativo Fit for 55 para reducir polo menos un 55 % as emisións de CO₂ da UE en 2030 respecto de 1990 e alcanzar a neutralidade climática en 2050, concibido para transformar o tecido produtivo da Unión Europea.

Os obxectivos xa son legalmente vinculantes e o "Fit for 55" é a folla de ruta para alcanzalos exposta pola Comisión, que abarca desde a agricultura ata o transporte marítimo.

Sempre de cara a as negociacións finais co Consello e a Comisión, dentro dos textos sometidos hoxe ao pleno para fixar a súa posición, o Parlamento tamén votou a favor de ampliar as esixencias climáticas á aviación, obrigando a facer pagar polo CO₂ emitido tamén aos voos de países non comunitarios.

Os eurodeputados avogan tamén por retirar os dereitos de emisión gratuíta de CO₂ á aviación en 2025, con excepcións ata 2030 para as rexións ultraperiféricas como as Illas Canarias.

A pesar de que está aínda en tramitación, o Fit for 55 viuse xa reforzado a teor das turbulencias enerxéticas e xeopolíticas con outra proposta, Repower EU, para que a UE recorte a súa dependencia do gas ruso nun 66 % nun ano, o que carrexará máis cambios nas políticas climáticas comunitarias.