A ultradereita e a esquerda disputarán a presidencia de Chile

O ultradereitista José Antonio Kast e o esquerdista Gabriel Boric disputarán a segunda volta das eleccións presidenciais que se celebrarán o próximo 19 de decembro.

Na primeira ronda, e con máis do 98 por cento das mesas escrutadas, Kast impúxose co 28 por cento dos votos e no seu discurso de celebración presentouse como o único capaz de recuperar a paz social.

En segundo lugar quedou o candidato da alianza de esquerdas Apruebo Dignidad, Gabriel Boric, que reuniu o 25 por cento de apoios.

A sorpresa foi Franco Parisi, un economista residente nos Estados Unidos que obtivo o 13 por cento dos votos cunha campaña exclusivamente virtual.

Os partidos tradicionais, fóra da segunda volta

As enquisas levaban semanas anticipando o ascenso de Kast, pero case ningunha o colocaba por encima de Boric, un exlíder estudantil ecoloxista e feminista, que busca implantar un Estado do benestar parecido ao de Europa.

Ambos integran formacións de recente creación e é a primeira vez desde o retorno á democracia que os partidos tradicionais de centroesquerda e centrodereita quedan fóra da contenda.

Libertario no económico e ultraconservador no social, con duras posturas contra o aborto ou o matrimonio igualitario, Kast non quere que lle poñan a etiqueta de extrema dereita, pero é compracente coa ditadura de Augusto Pinochet e seguidor do estadounidense Donald Trump e o brasileiro Jair Bolsonaro.

"Chile merece paz e liberdade", dixo ante centos de simpatizantes tras coñecer os resultados e dar as "grazas a Deus". A promesa de aplicar man dura contra a crecente violencia ou construír unha franxa para frear a migración ilegal no norte explican parte do avogado ultracatólico, que arrincou a campaña sen apenas apoio pero foi absorbendo ao oficialista Sebastián Sichel.

"Hoxe recibimos un mandato e unha responsabilidade que é tremenda, liderar un disputa pola democracia, pola inclusión, pola xustiza e polo respecto á dignidade de todos", indicou pola súa banda Boric desde a sede do seu comando en Santiago.