A xustiza concédelle unha pausa ao xuízo contra Trump polo asalto ao Capitolio

A xuíza Tanya Chutkan aceptou este venres concederlle unha pausa ao xuízo que enfronta Donald Trump en Washington polo asalto ao Capitolio para dar tempo ao fiscal especial, Jack Smith, a avaliar como proceder tras a vitoria do republicano nas eleccións do martes.

A maxistrada autorizou que se suspendan os prazos pendentes e que o Goberno presente para o 2 de decembro as súas deliberacións sobre o camiño a seguir neste caso penal, tal e como solicitaba Smith.

O fiscal pediu a pausa para estudar como avanzar en consonancia coas políticas do Departamento de Xustiza, que impiden investigar os presidentes mentres estean en exercicio e que, por tanto, obrigarían a Smith a pechar o caso.

Este 21 de novembro estaba previsto que os avogados de Trump lle presentasen á xuíza a súa documentación sobre por que non debería ser xulgado en Washington despois de que o Supremo ditaminase que os expresidentes gozan dunha ampla inmunidade xudicial.

Trump, que o martes venceu á candidata demócrata, Kamala Harris, está acusado no distrito de Columbia polos seus intentos para reverter os resultados das eleccións que perdeu no 2020 contra Biden e por instigar presuntamente o asalto ao Capitolio de xaneiro de 2021.

Está previsto que se certifique a súa vitoria o 6 de xaneiro e que sexa investido o día 20 dese mes.

Como avanzar tras os comicios

Segundo o diario The New York Times, Smith xa iniciara discusións con integrantes do Departamento de Xustiza sobre como avanzar tras as eleccións nos dous casos federais: o do Capitolio e a acusación en Florida por levarse da Casa Branca documentos clasificados.

A cadea NBC News engadiu que o Departamento de Xustiza parece asumir que nin o proceso en Washington nin o de Florida poden ter lugar nun futuro próximo e que agora que foi elixido de novo non ve marxe para continualos.

O fiscal especial non solicitou de momento unha pausa no proceso en Florida. Ese caso foi desestimado o 15 de xullo, pero Smith reclamou o 26 agosto a un tribunal de apelacións que fose restaurado.

Promesas en campaña

O republicano dixo durante a campaña que no seu primeiro día como presidente despediría a Smith e ordenaría ao Departamento de Xustiza pechar os casos na súa contra que, segundo sostén, foron motivados por unha persecución política.

Trump enfronta catro xuízos penais paralelos: os dous federais e outros dous en cortes locais de Nova York e de Xeorxia.

O único onde hai condena é o que ten en Nova York por falsificación de rexistros comerciais para encubrir un pago á actriz porno Stormy Daniels, con quen supostamente tivo unha aventura no pasado, para evitar que lle prexudicase na súa campaña de 2016.

O obxectivo do equipo de Trump, segundo a NBC News, é que todos os casos sexan desestimados. No de Nova York, contémplase tamén a posibilidade de pospoñer de forma indefinida a vista programada para finais de novembro.

Segundo a Constitución estadounidense, un presidente non pode perdoarse nunha acusación estatal, como sucede en Nova York, e no caso de Xeorxia, onde está acusado de inxerencia electoral, tampouco podería indultalo o gobernador.