Alemaña celebrará eleccións anticipadas o 23 de febreiro

Alemaña celebrará o próximo 23 de febreiro eleccións anticipadas tras a ruptura da coalición de Goberno, segundo a data pactada polos grupos parlamentarios do Partido Socialdemócrata (SPD) e o principal partido da oposición, a Unión Cristianodemócrata (CDU).

A data aínda debe ser confirmada polo presidente xermano, Frank-Walter Steinmeier, quen debe disolver o Parlamento despois de que o chanceler, o socialdemócrata Olaf Scholz, se someta a unha moción de confianza que se celebrará previsiblemente o 16 decembro.

Scholz perderá esta moción de confianza por estar en minoría, segundo adiantan varios medios alemáns como 'Der Spiegel' e a primeira cadea de televisión pública ARD.

O cronograma das eleccións

O pacto foi alcanzado polos líderes da SPD e da CDU e apoiado polos liberais do FDP -que foron expulsados da coalición o mércores pasado- e por Os Verdes, que forman xunto aos socialdemócratas un Goberno en minoría.

Scholz pedira aos líderes das fraccións parlamentarias que acordasen unha data para as eleccións anticipadas. Nun inicio, o chanceler alemán quería someterse á moción de confianza o 15 de xaneiro, pero tanto a CDU como outras formacións políticas xermanas meteron presión para que os comicios se celebrasen de xeito inmediato. 

Unha vez convocada a data da moción de confianza -previsiblemente será o 16 de decembro-, os deputados terán en principio 48 horas para votar. Despois Steinmeier dispoñerá dun máximo de 21 días para disolver o Parlamento. A partir de aquí abrirase un período de 60 días para a celebración de eleccións. Todo apunta que serán o 23 de febreiro.

O líder da CDU, Friedrich Merz, é o favorito para suceder a Scholz na chancelería

A ruptura do Executivo de coalición non beneficia ao SPD nas enquisas. De celebrarse agora comicios obtería o 15,5 % dos votos, segundo unha enquida de INSA publicada este martes polo diario BILD.

A CDU, cuxo líder, Merz, é o favorito para suceder a Scholz na Chancelería, lidera as sondaxes cun 32,5 %, un 0,5 % máis con respecto a outubro; e Os Verdes conseguirían un 11,5 %  (un 1 % máis).

O gran beneficiado do fin da coalición é a ultradereitista Alternativa para Alemaña (AfD), que conseguiría un 19,5 % (+1,5 %). O FDP de Lindner avanzaría un 0,5 % ata exactamente o limiar do 5 % necesario para entrar no Parlamento. O partido de esquerda populista Alianza Sahra Wagenknecht (BSW) conseguiría un 7 % (-1 %) e A Esquerda un 3,5 %.

Na clasificación de políticos, Scholz ocupa o posto 19 dos 20 políticos máis populares, con só 32,7 puntos (menos 1). O claro favorito para os alemáns é o ministro de Defensa, Boris Pistorius (SPD), con 53,1 puntos. Merz ocupa o cuarto posto, con 43,4 puntos.