A ultradereita liderará o proceso constituínte en Chile e terá dereito de veto
A ultradereita liderará o proceso constituínte en Chile e terá dereito de veto
O Partido Republicano, partidario de manter a actual Constitución chilena, arrasou este domingo nas eleccións constituíntes cun 35,5 % dos votos
O presidente Boric pediulles actuar con "sabedoría e temperanza"
![](https://img-g24-crtvg.flumotion.com/prog24/2023/20230508/ultradereitalideraconstituintechile.png)
O ultradereitista Partido Republicano, partidario de manter a actual Constitución chilena, arrasou este domingo nas eleccións constituíntes cun 35,5 % e conseguiu polo menos os 20 conselleiros necesarios para ter poder de veto no órgano constitucional.
En segundo lugar, quedou a lista Unidade Para Chile (28,3 %), integrada pola maioría dos partidos que integran a coalición oficialista (a Fronte Ampla do presidente Gabriel Boric, o Partido Comunista e o Partido Socialista), mentres que a terceira posición foi para a dereita tradicional, aglutinada en Chile Seguro (21,2 %).
Moi por encima do que prognosticaban as enquisas, a extrema dereita e a dereita tradicional teñen maioría absoluta xuntas e conseguen máis dos 30 escanos necesarios para aprobar as novas normas constitucionais sen necesidade de pactar coa esquerda e marcar o rumbo así da nova proposta de Carta Magna.
O Partido Republicano, creado en 2019, está liderado por José Antonio Kast, quen perdeu contra Boric nas eleccións de 2021 e é un defensor acérrimo do modelo económico neoliberal instaurado en Chile pola ditadura militar (1973-1990). "Que nunca máis o sectarismo se apodere da nosa patria", dixo un Kast eufórico na sede do seu partido.
A ultradereita arrasou na maioría das 16 rexións de Chile e mesmo se fixeron con feudos tradicionalmente da esquerda, como a Rexión de Valparaíso ou a Metropolitana, onde se atopa a capital.
O presidente de Chile, Gabriel Boric, pediulle ao Partido Republicano "actuar con sabedoría e temperanza" En cadea nacional, o mandatario instou así mesmo á formación ultra a "non cometer os mesmos erros" do primeiro proceso constitucional, dominado pola esquerda e que fracasou o pasado setembro tras o rexeitamento en plebiscito da proposta de Carta Magna.
Os 50 conselleiros -25 homes e 25 mulleres- tomarán posesión o próximo 7 de xuño e terán cinco meses para redactar a proposta de texto, que se someterá a plebiscito o 17 de decembro.
O mesmo día da instalación, os conselleiros recibirán un borrador que 24 expertos designados polo Parlamento levan redactando desde marzo e que cumpre con 12 principios básicos acordados a priori polos partidos para evitar unha proposta refundacional como a anterior.