A ultradereita portuguesa propoñeralle ao Parlamento denunciar o presidente Rebelo por "traizón á patria"

O partido de ultradereita portugués Chega propoñerá ao Parlamento levar ante a xustiza o presidente luso, Marcelo Rebelo de Sousa, por "traizón á patria" polas súas declaracións a favor das reparacións ás excolonias de Portugal, aínda que a iniciativa non ten visos de prosperar.

A proposta, que necesitaría o apoio de dous terzos dos deputados e coas posicións manifestadas ata o momento polos diferentes partidos non conseguiría saír adiante, foi anunciada este martes polo presidente de Chega, André Ventura, e é inédita no país.

"O presidente da República deixou de representar o interese nacional e pasou a representar o interese doutros Estados", afirmou Ventura en declaracións a xornalistas na Asemblea da República, tras unha reunión do seu grupo parlamentario.

Na orixe da iniciativa de Chega están unhas declaracións de Rebelo de Sousa durante unha cea con correspondentes estranxeiros en Portugal o pasado martes, na que se mostrou partidario de que "se asuma a responsabilidade" polos danos que supuxo a colonización para outros países. "Imos ver como se consegue, facer unha reparación diso", dixo Rebelo de Sousa, quen sinalou que "se trata de comportamentos históricos inaceptables".

As palabras causaron polémica no país e levaron o Goberno de centrodereita liderado por Luís Montenegro a asegurar, nun comunicado, que non está "en cuestión" ningún proceso ou programa de accións específicas para levar a cabo reparacións ás excolonias.

Chega pediu un voto de condena en contra de Rebelo de Sousa no Parlamento, pero quere ir máis aló e propoñerá unha acción criminal.