A xefa de prensa da selección admite que recibiu presións

A xefa de prensa da selección española feminina, Patricia Pérez, declarou este xoves na Audiencia Nacional que recibiu presións en relación ás manifestacións da xogadora Jenni Hermoso tras o bico que o expresidente da Federación Española de Fútbol (RFEF), Luís Rubiales, deulle despois da final do Mundial.

Pérez prestou declaración como testemuña ante o xuíz Francisco de Jorge, titular do Xulgado Central de Instrución número 1, que investiga a Rubiales por agresión sexual e coaccións, e admitiu recibir presións por parte de responsables federativos sobre a versión dos feitos, segundo puido confirmar EFE.

A responsable de prensa da selección, que acudiu xunto a un avogado á Audiencia, fixo tamén entrega do seu teléfono móbil no xulgado para proceder ao seu envorcado en relación ás presuntas coaccións á futbolista e á súa contorna para que dixese que o bico foi consentido.

O irmán da xogadora, Rafael Hermoso, que xa prestou declaración como testemuña o pasado día 25, tamén acudiu hoxe ao xulgado para proceder a igualmente ao envorcado do seu móbil e que se poidan revisar as chamadas e mensaxes que lle chegaron para que presuntamente interferise no relato da futbolista sobre o sucedido na final do Mundial en Sydney (Australia).

O xuíz escoitou tamén esta xornada a declaración como testemuña do exdirector de Integridade da RFEF, Miguel García Caba, quen defendeu a súa actuación en relación ao informe interno que elaborou o departamento que encabezaba sobre o sucedido na final do Mundial e que pechou sen ningunha consecuencia para o expresidente e sen escoitar o testemuño de Jenni hermoso, segundo fontes próximas ao caso.