A xuíza ve indicios de que o cargo do irmán de Pedro Sánchez se creou para asignarllo a el

A xuíza instrutora da causa aberta a David Sánchez, irmán do presidente do Goberno Pedro Sánchez; apunta que o posto de coordinador dos conservatorios de música adscritos á Deputación de Badaxoz "se creou para ser asignado" a esta persoa.

A titular do Xulgado de Instrución 3 de Badaxoz, Beatriz Biedma, considera que os indicios de criminalidade existentes na causa "fóronse corroborando polas dilixencias de investigación xa practicadas".

Así, e no marco da súa decisión de non sobreser a causa respecto aos investigados, como así pediran as defensas, a xuíza expón que as motivacións expresadas na Memoria da proposta de creación do citado posto de coordinador foron negadas polos directores dos conservatorios.

Ademais, recolle no seu auto que outros investigados apuntaron a que a creación do devandito posto era "unha necesidade política de difusión das actividades culturais" dos conservatorios.

Unha orixe que, "se fose certa, non entende esta xulgadora por que non se fixo constar así na documentación respectiva".

Doutra banda, considera que tampouco se xustifica a necesidade de que o citado posto de traballo tivese consideración de "persoal de Alta Dirección", pois, "segundo a doutrina e xurisprudencia, o seu uso debe ser restritivo e debe motivarse sempre".

Tamén expón que a petición de cobertura do posto de coordinador "realizouse no momento en que David Sánchez estaba a buscar traballo" e sinala que atopa "irregularidades" no proceso de selección dos candidatos.

"Todo parece indicar que o posto se creou para ser asignado ao Señor Sánchez, facéndose patente a non necesariedade das súas funcións moi pronto", agrega a xuíz no seu auto, pois, segundo afirma, "non se dispuxo que fose substituído por outro traballador" durante a súa excedencia e a súa baixa de paternidade, e "a súa actividade centrouse no Proxecto Ópera Nova".

Biedma ampliou as dilixencias probatorias coa citación de novas testemuñas e a solicitude de documentación.