A Xunta abrirá en 2025 unha oficina económica en Madrid

A Xunta porá en marcha unha oficina económica en Madrid. O goberno galego comezará os traballos para poñela en marcha o vindeiro exercicio.

Situarase na sede da Casa de Galicia en Madrid, e servirá coma plataforma de apoio tanto para os empresarios galegos que desexen emprender fóra coma para os empresarios do resto do Estado que queiran investir en Galicia.

Ademais, tamén servirá de altofalante para as políticas da Xunta en materia de apoio á actividade económica.

A conselleira de Economía, María Jesús Lorenzana, revela que o obxectivo é "reforzar a implantación empresarial e a captación de investimentos" para contribuír á chegada de empresas á comunidade.