A XEC non atende a petición do PSOE e rexeita revisar os votos nulos de Madrid

A Xunta Electoral Central desestimou o recurso do PSOE que pedía revogar o escrutinio dos votos emitidos en Madrid nas eleccións xerais do pasado 23 de xullo e, máis aló de corrixir tres papeletas, confirmou a repartición de escanos que deu por boa a Xunta provincial.

O PSOE pediu revisar todos os votos nulos do 23X en Madrid, pois, segundo os seus cálculos, se se validase o 4,43 % das 30.200 papeletas que foron cualificadas como nulas, os socialistas poderían 'recuperar' o escano que gañou o PP tras o reconto do voto exterior.

Pero a Xunta Electoral rexeita a pretensión do PSOE subliñando que "non se aduce ningún motivo ou indicio de irregularidade" no tratamento dos votos nulos, nin sequera se cuestiona o procedemento seguido.

"Perséguese, en suma, converter a Xunta Electoral Provincial nunha mesa de revisión universal de todos os votos declarados nulos por todas as mesas da circunscrición sen aducir unha irregularidade concreta que xustifique ese exame. Unha medida desa natureza, en opinión desta Xunta, carece de ancoraxe constitucional e legal posto que desfiguraría radicalmente o procedemento previsto na LOREG, impediría cumprir cos prazos legais establecidos e podería mesmo afectar a constitución das cámaras", conclúe o máximo organismo arbitral.