A Xunta non emitirá informes sobre parques eólicos mariños ata que haxa un marco legal
A Xunta non emitirá informes sobre parques eólicos mariños ata que haxa un marco legal
"Nestes momentos os parques non se poden tramitar", asegura Francisco Conde, vicepresidente primeiro da Xunta e conselleiro de Economía, Industria e Innovación
O vicepresidente primeiro da Xunta e conselleiro de Economía, Industria e Innovación, Francisco Conde, afirmou que desde Galicia non se emitirán os informes de carácter ambiental solicitados polo Ministerio para a instalación dos parques de eólica mariña ata que exista un marco normativo estable.
"Nestes momentos os parques non se poden tramitar, non hai un marco legal para a súa tramitación e, por tanto, non ten sentido que se nos estean solicitando informes de impacto ambiental", dixo Conde en declaracións aos xornalistas tras participar nunha reunión do Observatorio da Eólica Mariña de Galicia.
"A decisión compartida dentro do Observatorio é que a Xunta non vai emitir estes informes ata o momento en que estea aprobado por parte do Ministerio o marco normativo que estableza o procedemento de tramitación dos parques eólicos mariños", asegurou.
Admitiu o conselleiro, con todo, que ese marco legal terá que esperar á constitución dun novo Goberno, tras a convocatoria das eleccións xerais que se celebrarán o 23 de xullo.
A pesar diso, considerou que "compartir información, sobre todo da planificación dos espazos marítimos parece razoable", e engadiu que nese sentido si se poderían dar pasos na procura de "consenso e diálogo" por parte do Ministerio coas autonomías e co sector para traballar conxuntamente no desenvolvemento da eólica mariña e nun marco normativo "garantista".
"En Galicia temos unha lei que establece cal é o procedemento normativo e cal é o procedemento que ten que desenvolver un promotor para tramitar desde o punto de vista administrativo un parque. Nestes momentos, na eólica mariña ese marco normativo non existe, non hai un marco que estableza exactamente cal é o procedemento", precisou.
De igual forma, indicou que tampouco existe un marco normativo que estableza os trámites para as poxas "que delimite o lugar exacto no que un parque poida ser admitido a trámite".
"Non hai posibilidade nestes momentos de tramitar administrativamente ningún parque eólico, e, nese contexto, avanzar informes sectoriais non parece o mellor procedemento para dar certezas, sobre todo ao sector", sinalou.
