A Xunta preiteará para que lle aboen os gastos tras recuperar 5 toneladas de 'pellets'

A Xunta anunciou este mércores que presentará un recurso para que o Goberno reclame á armadora do buque Toconao os 2,375 millóns de euros que asegura gastou no operativo de vixilancia e limpeza de praias provocado pola vertedura de 26.250 quilogramos de granulados, dos que se recuperaron unha quinta parte, 5,5 toneladas.

A vicepresidenta segunda da Xunta en funcións, Ánxeles Vázquez, e o conselleiro de Mar en funcións, Alfonso Villares, explicaron que se recuperaron 3,65 toneladas de pellets por parte do operativo galego, o equivalente a 146 sacos, mentres que os voluntarios e os concellos recuperaron 1,88 toneladas, o que supón 5,53 toneladas, o equivalente a 201 sacos dos 1.050 que transportaba o buque.

Vázquez explicou que existe unha lei estatal de 2007 que establece o principio de que "quen contamina paga", e como a Xunta non contaminou, pois deben ser outros quen aboe os gastos nos que incorreu o Goberno autonómico, abundou.

Segundo indicou en conferencia de prensa para facer balance da vertedura ocorrida o pasado mes de decembro, unha vez que o Goberno non contestou ao requirimento da Xunta para que reclame á armadora estes custos, o Executivo autonómico recorrerá "o silencio administrativo negativo" á súa petición para poder recibir estes fondos.

"Xa que non axudaron cando tiñan que facerse cargo de todo, (o Goberno) que demande a quen teña que demandar, senón haberá algo raro, non quero crer que haxa abandono de funcións", advertiu a conselleira, que sinalou que é competencia do Goberno reclamar estes fondos.

A tamén conselleira de Medio Ambiente en funcións destacou que o operativo autonómico recuperou outros 20.238 quilogramos doutros residuos plásticos, "case catro veces máis que de pellets", o que evidencia un problema de contaminación por este material e de necesidade de concienciación por parte dos cidadáns.

En total, o operativo da Xunta actuou en 633 praias, o 65 % do total, dos 66 municipios dos 77 que teñen areais na comunidade.

Ademais, tanto Vázquez como Villares insistiron en comparar a actuación "transparente" e adecuada do Executivo autonómico coa do Goberno que, segundo a súa versión, non avisou á Xunta da vertedura ata o 3 de xaneiro a pesar de que se produciu o 8 de decembro en augas portuguesas, e a que as competencias para a recollida de granulados no mar son estatais.

"Tras o paso do tempo demóstrase que para moitos -o Goberno e a oposición- era máis unha cuestión política que científica", concluíu Vázquez.