A xustiza estuda a última bala de Begoña Gómez para apartar o xuíz Peinado
A xustiza estuda a última bala de Begoña Gómez para apartar o xuíz Peinado
A muller do presidente do Goberno acusa ao maxistrado de prevaricación. Os outros dous intentos foron rexeitados
Patxi López confirma que estuda querelarse contra "este PP" para frear a "difamación e o acoso"
"Por que xa non se poden traspasar máis liñas vermellas e hai que pór límites". Se quedaba algunha ponte en pé entre Sánchez e Feijóo, a ofensiva xudicial levouna por diante.
Di o voceiro socialista no Congreso, Patxi López, que a "difamación, o ataque e o acoso teñen que ter limites". E confirma que o Partido Socialista está a estudar querelarse contra "este Partido Popular". Unha estratexia errónea, segundo a vicepresidenta segunda do Goberno.
Yolanda Díaz, advirte que o "e ti máis", non soluciona os problemas nin remata coa corrupción. Para iso, di, necesítanse propostas enriba da mesa. Non semella que o seu chamamento vaia dar froitos a curto prazo.
O PP defende a súa estratexia. E acusa o Goberno de debilitar os controis democráticos. Di Feijóo que con iso Pedro Sánchez "non buscaba outra cousa ca impunidade por que sabía que todo ía saír a luz". E reivindica un executivo sen sombra de dúbida porque España, di Feijóo, "merece un goberno limpo".
Nesta táctica, o líder popular xa sabe que non vai poder contar co PNV que, de momento, non se propón retirarlle o apoio ao Goberno. Este martes, o Tribunal Superior de Xustiza de Madrid analiza a querela por prevaricación que lle presentou a muller do presidente do Goberno ao xuíz que a investiga.
É a terceira deste tipo sobre a que ten que pronunciarse. As outras dúas rexeitounas. Que vai pasar con esta saberémolo pronto. A querela do PP contra o PSOE por financiamento irregular tampouco prosperou. Malia os reveses xudiciais, uns e outros avisan que non van cambiar de estratexia.
