Acordo de Xunta e Deputación para restaurar o Convento de Santa Clara de Pontevedra

O presidente da Xunta, Alfonso Rueda, e o presidente da Deputación de Pontevedra, Luís López, asinaron este venres un acordo para colaborar na rehabilitación e ampliación do convento de Santa Clara de Pontevedra, que se integrará no Museo Provincial. No convenio a Xunta comprométese a facer unha achega de 6 millóns de euros.

O obxectivo da restauración, presupostada inicialmente en 23 millóns de euros, é poñer en valor este edificio do século XIII, situado no corazón da cidade. Prevén iniciar as obras este ano e rematalas no 2027, coincidindo co centenario do Museo de Pontevedra.