Acordo para compensar mariscadores da ría do Burgo
Cobrarán uns 1.500 euros ao mes durante os dous anos que durarán os traballos
Hai acordo entre mariscadores e administracións para iniciar as obras de dragaxe da ría do Burgo. Recibirán arredor de 3 millóns de euros por non poder pescar en dous anos. Era o último trámite necesario para comezar unhas obras longamente demandadas.
Os mariscadores recibirán mensualmente arredor de 1500 euros en compensación pola falta de actividade no tempo que duren os traballos. A Xunta de Galicia certificará as contías que cobre cada un dos 78 afectados e o Estado encargarase de achegar os cartos necesarios.
As obras poderán comezar de inmediato. O primeiro paso será a retirada do marisco que aínda queda nos bancos, uns traballos que asumirá a propia confraría de pescadores.
O acordo da luz verde a uns traballos que permitirán rexenerar a ría e crear novas zonas verdes para o uso cidadán. O proxecto estará rematado a primeiros de 2024 e terá un investimento de máis de 32 millóns de euros.
