Sunak adianta as eleccións no Reino Unido para o 4 de xullo

O primeiro ministro británico, Rishi Sunak, anunciou este mércores o adianto das eleccións xerais no Reino Unido para o próximo 4 de xullo.

A inesperada decisión, anunciada por Sunak fronte ao número 10 de Downing Street, chega cando os conservadores se atopan a grande distancia por detrás da oposición laborista, segundo todas as enquisas, e o mesmo día en que se coñeceu que a inflación baixou en abril ao 2,3%, o seu nivel máis baixo en case tres anos.

Baixo a incesante choiva londiniense, o primeiro ministro compareceu durante algo menos de oito minutos para explicar aos medios que informou previamente o rei Carlos III da súa intención de chamar ás urnas o 4 de xullo, a pesar de que podía facelo en calquera momento antes do 28 de xaneiro, fin da lexislatura.

Tras asegurar que o Reino Unido atravesou o seu momento máis complicado desde a II Guerra Mundial, Sunak dixo que o seu Goberno se centrou en devolver a estabilidade económica ao país tras a pandemia da covid.

"Cheguei ao Goberno prometendo estabilidade económica, e grazas ao esforzo colectivo  conseguimos dous fitos: a nosa economía está a crecer máis rápido do que ninguén prevía (...) e a inflación volveu á normalidade. Isto é a proba de que as nosas prioridades están a funcionar", agregou.

Nunha declaración que converteu no seu primeiro acto de campaña, Sunak dixo que o Reino Unido deberá elixir entre os seus tories e os laboristas de Keir Starmer, o que, ao seu xuízo, "sería como volver á casa de saída".

"Starmer mostrou unha e outra vez que sempre tomará o camiño máis fácil", atacou o primeiro ministro, tras presentarse como alguén que adoptou medidas difíciles e impopulares cando así se necesita.

Na súa primeira reacción á convocatoria electoral, o laborista Keir Starmer repetiu como un mantra a palabra "cambio", que sen dúbida será o leit motiv da súa campaña.

Starmer pediu o voto para "un Partido Laborista reformado", que traerá estabilidade e un novo estilo de política e economía "ao servizo da xente traballadora".

"Xuntos podemos deter o caos, pasar páxina e comezar a reconstruír o Reino Unido e cambiar o noso país", declarou.

O anuncio pillou por sorpresa a analistas e expertos, a teor da distancia duns 20 puntos que as enquisas outorgan aos laboristas sobre os tories, que lles poderían resultar suficientes para alcanzar a maioría absoluta.

Ademais, fai só tres semanas celebráronse unhas eleccións municipais nas que os conservadores tiveron uns resultados historicamente baixos, coa perda da metade dos seus concelleiros nas localidades onde se votaba.