O agro e o mar unen forzas en Madrid para que escoiten os seus berros en Bruxelas
O agro e o mar unen forzas en Madrid para que escoiten os seus berros en Bruxelas
Asaja, COAG e UPA convocaron unha protesta este luns coincidindo coa xuntanza do Consello de Ministros de Agricultura da UE
Os sector pesqueiro acode á manifestación para defender o dereito a unha "produción e distribución digna de alimentos básicos"
Os tractores en Madrid o pasado mércores. EFE/ Sergio Pérez
Un cento de tractores e milleiros de labregos de toda España, convocados polas organizacións agrarias Asaja, COAG e UPA, percorrerán este luns o centro de Madrid baixo o lema "O campo esixe apoio, respecto e recoñecemento" para reclamar solucións aos problemas do sector agrario.
A protesta, que coincide coa xuntanza do Consello de Ministros de Agricultura da UE en Bruxelas, comeza ás 11:00 horas no Ministerio de Agricultura para discorrer polo centro da cidade ata a Oficina da Comisión Europea en Madrid.
Os mandatarios comunitarios van debater posibles xeitos de garantir respostas rápidas e estruturais á crise actual que vive o agro. Tamén van abordar a flexibilización da PAC e a negociación das cláusulas espello, dúas das principais demandas dos produtores.
Agricultores e gandeiros tamén lembran que en España hai que abordar reformas esenciais na Lei da Cadea Agroalimentaria, no sistema de seguros agrarios ou na fiscalidade e facer investimentos urxentes en materia de regadíos.
Bocadillos de luras
Desta volta, o sector pesqueiro únese á protesta baixo o lema "Polo futuro da pesca, a acuicultura, as peixarías e a saúde dos consumidores en España". Durante o percorrido repartirán máis de 1.000 bocadillos de luras, como símbolo da fusión dunha das iconas máis enxebres da capital co mar.
Na marcha estarán a Asociación Empresarial de Acuicultura Española (Apromar), a Confederación Española de Pesca (Cepesca), a Federación Nacional de Asociacións Provinciais de Empresarios Detallistas de Peixes e Produtos Conxelados (Fedepesca) e a Federación Nacional de Confrarías de Pescadores (FNCP).
O seu obxectivo é sumar a cidadanía para defender co Goberno e xunto ao seu sector primario, ante Bruxelas, o dereito a unha "produción e distribución digna de alimentos básicos, único xeito de asegurar unha alimentación de calidade e un consumo saudable".
Coa súa participación, reforza o seu apoio ao sector agrario co que comparte reivindicacións como a "obsesión medioambiental" da UE á hora de lexislar, a complexidade administrativa ou a competencia desleal de terceiros países. Ademais, defende as súas propias.
Planas pedirá flexibilidade
En Bruxelas, o ministro de Agricultura, Pesca e Alimentación, Luis Planas, asegurou que vai defender unha simplificación da PAC dentro das marxes posibles, a necesidade de impoñer cláusulas espello ou a conveniencia de lexislar da man de agricultores e gandeiros.
A xuntanza semella clave para o futuro do sector agrario europeo tras a proposta da Comisión Europea de relaxar algúns dos requisitos ambientais da Política Agraria Común (PAC) que deben cumprir as explotacións para aliviar a súa carga administrativa.
