Air Europa cancela outros seis voos este xoves pola folga de pilotos
Air Europa cancela outros seis voos este xoves pola folga de pilotos
Esta quenda de paros continúa ata o 2 de xullo e en total afectará a 135 voos
Os voos cancelados este xoves son un de ida e volta entre Madrid e Vigo, entre Madrid e París Orly e entre Madrid, Asunción e Córdoba, na Arxentina
![](https://img-g24-crtvg.flumotion.com/prog24/2023/20230628/air-europa-folga.png)
Air Europa cancelou outros seis voos da súa programación prevista para este xoves pola nova folga que secundan os seus pilotos desde o pasado 19 de xuño e ata o domingo 2 de xullo en todas as bases e centros de traballo da compañía en España.
O Sindicato Español de Pilotos de Liñas Aéreas (Sepla) convocou unha nova quenda de 14 xornadas de folga para os días 19, 20, 21, 22, 23, 24, 25, 26, 27, 28, 29 e 30 de xuño e 1 e 2 de xullo, en pleno inicio das vacacións, pola postura de "confrontación" que adoptou a empresa na negociación do novo convenio.
Sepla demanda un acordo que poña fin a once anos de perda de poder adquisitivo "sen ter que ceder dereitos laborais recollidos no IV Convenio Colectivo".
A organización sindical xa convocou oito xornadas de folga entre o 22 de maio e o 2 de xuño, nas que se cancelaron 114 voos tanto nacionais como europeos, e unha primeira quenda de catro a principios de maio, que se saldou con 68 operacións suprimidas.
Esta terceira convocatoria obrigou a aeroliña a cancelar 135 voos durante as catorce xornadas de protesta que afectan, ademais de varias rutas nacionais e europeas como nas dúas ocasións anteriores, unha de longa distancia.
Os voos cancelados este xoves son un de ida e volta entre Madrid e Vigo, entre Madrid e París Orly e entre Madrid, Asunción e Córdoba (A Arxentina).