Aitana e Lola Índigo pechan a cuarta edición do Morriña Fest na Coruña
Aitana e Lola Índigo pechan a cuarta edición do Morriña Fest na Coruña
Unhas 40.000 persoas vibraron coa música dun dos acontecementos musicais do verán na cidade
O sol que apenas asomara timidamente durante a mañá quentou con rigor as últimas horas de espera. Os morriñosos aturaron estoicamente a calor nunha cola extensa e estática que tornou en carreira precipitada en canto abriron as portas no peirao.
As entradas estaban esgotadas. O segundo día do Morriña Fest comezou coa música electrónica do DJ Toni Seijas e coa promesa dunha noite inesquecible. No cartel, o punki-pop de La La Love you, estrelas da música urbana como Yandel e dúas mulleres que arrasan, Aitana e Lola Índigo.
O coruñés Íñigo Quintero cancelou a súa participación no Morriña por problemas de saúde. Foi quizais a única nota negativa dun festival consolidado e ambicioso co que nesta cuarta edición vibraron 40.000 almas.
