Aviso laranxa por temporal costeiro no litoral da Coruña e de Pontevedra

Varios buques decidiron fondear na ría de Vigo, refuxio habitual cando as condicións do mar impiden unha boa navegación.

O temporal pintou de laranxa o litoral das provincias de Pontevedra e da Coruña por un fenómeno de mar combinado que deixou ventos de forza sete e ondas de máis de sete metros. Na praia da Frouxeira, en Valdoviño, o Atlántico batía con especial crueza.

Na costa lucense o aviso foi amarelo por mar de fondo. Na Mariña e nas comarcas costeiras da Coruña o vento soprou intensamente, con refachos de oitenta quilómetros por hora.

O temporal irá a menos durante a xornada deste domingo. Á noitiña todos os avisos costeiros quedan desactivados.