Martiño Noriega encabeza de novo a candidatura que opta a dirixir Anova

Anova-Irmandade Nacionalista, formación do histórico nacionalista Xosé Manuel Beiras, celebra este sábado a súa VI asemblea nacional en Santiago de Compostela, unha cita para a que a organización presentou unha candidatura de unidade para a coordinadora nacional.

A lista está formada por 35 persoas, entre as que destaca Beiras co número 20. Entre os integrantes tamén se atopan os exparlamentarios autonómicos Flora Miranda e Antón Sánchez; os alcaldes de Rianxo, Julián Bustelo; e de Sada, Benito Portela; e o tenente de alcalde do Val do Dubra, Antonio Regueira.

Ademais de militantes de todo o territorio galego, participan persoas que no seu momento integraron listas das mareas municipalistas. É o caso de Antía Paz e Alberto Lema, de Marea Atlántica, ou Concha de la Fuente e Miguel Penas, que estiveron en Compostela Aberta.

No encontro deste sábado elixirase a nova coordinadora nacional que, posteriormente, designará na súa primeira reunión a nova permanente. Prevese que Martiño Noriega, actual portavoz e alcalde de Santiago de Compostela entre 2015 e 2019, renove o seu labor dentro da organización.

Anova reafírmase

Anova define esta candidatura como "potente" e aspira con ela a un "rearmamento do espazo político". A propia organización analiza o estado da nación e alerta sobre o avance da extrema dereita e os danos que pode ocasionar no territorio galego proxectos como o da macrocelulosa de Altri en Palas de Rei (Lugo). 

Ademais, Anova subliña que "non renuncia ao legado da construción da unidade popular da década pasada" e lembra o "peche do ciclo" con espazos políticos que optaron por "posicións de parte" -en referencia a actores da esquerda federal-, mais fixa como prioridade "manter a tradición de acumular forzas".

A formación lembra a súa xenerosidade co Bloque Nacionalista Galego no último ciclo electoral e indica que no documento asinado co partido acordábase comezar un proceso de colaboración e redimensionar nos vindeiros anos o soberanismo galego.

"Unha posición" que, segundo consideran, tivo "un retorno social importante e un efecto cualitativo que non foi menor no resultado" das autonómicas aínda que non acadaron o obxectivo fundamental: "desaloxar do goberno do país á brigada de demolición do PP".

Con esta actualidade, Anova apunta que corresponde ao máximo órgano de decisión entre asembleas impulsar un proceso de diálogo e dotar de contido e feitos contrastados o documento de vontades asinado hai uns meses co BNG.