Antonio Rodríguez Troitiño, novo presidente da Federación Galega de Automobilismo

Non houbo sorpresas na asemblea da Federación Galega de Automobilismo e Antonio Rodríguez Troitiño, cabeza visible de Xeración Renova FGA xunto con Alfonso García Eiriz, será o novo presidente do ente rexional.

Troitiño, con 55 dos 57 votos emitidos na votación para presidente, certificou o que xa se vía vir desde hai semanas, o apoio superior á súa candidatura fronte á do outro candidato que se presentou finalmente, Carlos Álvarez Sindín, que soamente obtivo un voto ao seu favor.

Houbo un voto máis, que foi en branco. O novo presidente da FGA substitúe no cargo o carballiñés Iván Corral, que accedeu ao cargo no ano 1984.