As empresas de reformas, satisfeitas coa flexibilización das normas de habitabilidade
As empresas de reformas, satisfeitas coa flexibilización das normas de habitabilidade
O anteproxecto facilita a transformación de baixos comerciais en vivendas
Na Federgal din que xa están recibindo clientes potenciais
Na Federación de Asociacións de Empresas da Reforma e Rehabilitación de Galicia consideran que darlles aos baixos baleiros uso residencial beneficia o mercado da vivenda e frea unha degradación que entenden que se estaba cronificando.
"Por exemplo, un baixo que leva toda a vida cunha licenza cando queda baleiro e se volve alugar quizais xa non reúna as condicións, como os tres metros de altura, para poñer un negocio".
Neste sentido, apoian o anteproxecto que busca flexibilizar as normas de habitabilidade actuais, que segundo explica o voceiro de Federgal, Antonio Heredero, dificultan o cambio de uso.
"Se queres abrir unha ventá á vía pública ten que ser a un metro oitenta de altura co que as vivendas se converten en zulos. Esa e outras cuestións fan moi difícil rehabilitar os baixos como vivendas".
As empresas dedicadas ás reformas e ás rehabilitacións din que xa están recibindo clientela potencial.
"Xa hai moitos propietarios de locais que o ven como unha esperanza e nós, como empresarios das obras pequenas de reforma e rehabilitación, estamos enormemente satisfeitos porque pode supoñer unha carga moi boa de traballo, de traballo de calidade".
O anteproxecto para flexibilizar as normas de habitabilidade está en fase de consulta pública ata o día 13. O goberno galego prevé que entre en vigor este ano.
