As glamurosas fotografías de Manuel Outomuro, expostas en fachadas da Merca

"Fíxome nelas. Son moi bonitas. Pero non sei de quen son, nin quen son elas, nin nada". "Eu vou á farmacia e fixeime nelas porque mo dixeches ti, pero non sei nada delas. Quen puxo esa foto?", comentan dous veciños da Merca.

A mostra de Manuel Outomuro na súa localidade natal da Merca acaba de inaugurarse e a información aínda non chegou a todos os veciños, impresionados e sorprendidos polas fotografías que, de repente, adornan as rúas.

"Veño por aquí moitas veces en bicicleta e soprendeume. Ademais, non ten título nin ten nada". "Lástima non viñeran tamén á miña aldea, que me gustaría", sinalan un ciclista que pasa por alí e máis unha veciña.

Ana de Armas mira, abstraída, desde unha ventá, sobre a fachada da Casa da Cultura, a primeira parada desta ruta fotográfica. María de Medeiros asoma desde a porta que dá a un vello corredor, con Mónica Belucci en fronte, cegada polo sol da mañá. E, á sombra, é Ana Belén quen lles sorrí aos camiñantes.

Son en total 15 fotografías repartidas por todo o núcleo urbano, incluído o singular conxunto de canastros da Merca, desde onde nos contempla Carmen Maura nun retrato realizado para a revista Fotogramas no ano 1998.

A Nicole Kidman reservoulle o autor un lugar especial: a porta da que foi a súa casa natal, onde viviu ata os dez anos.

Manuel Outumuro, autor das fotografías: "Por moito mundo que percorrera, moito glamour que fotografiara, o que quedou deses dez anos, esa pegada, non se pode borrar".

A mostra poderase visitar ata o 10 de xaneiro do ano que vén.