O actor Russell Brand, acusado de violación e agresión sexual a catro mulleres

O actor e humorista británico Russell Brand, intérprete en películas como 'Get him to the Greek' (2010) e exesposo da cantante estadounidense Katy Perry, foi acusado este venres de varios delitos de violación e agresión sexual contra catro mulleres no Reino Unido.

A Policía Metropolitana de Londres anunciou a súa imputación tras ser autorizada pola Fiscalía, e Brand deberá comparecer ante un tribunal londiniense o próximo 2 de maio. Nun comunicado dixo que o comediante, de 49 anos e que anteriormente rexeitou as alegacións, está acusado de violación, agresión indecente, violación oral e dous cargos de agresión sexual.

A Policía precisou que en 1999 o actor, que reside, segundo apuntan os medios, nos Estados Unidos, presuntamente violou a unha muller na zona de Bournemouth, no sur de Inglaterra, e en 2001 agrediu sexualmente a outra no distrito de Westminster en Londres. Ademais, acúsaselle de violar oralmente e agredir sexualmente a unha muller en 2004 tamén en Westminster e, nesa mesma área, agredir sexualmente a outra entre 2004 e 2005.

A Policía comezou a investigación en setembro de 2023, tras recibir varias denuncias por mor das revelacións difundidas no programa 'Dispatches' de Channel 4 e o periódico 'The Sunday Times'. O detective superintendente Andy Furphy declarou hoxe que a investigación "segue aberta" e as denunciantes "continúan recibindo apoio de axentes especializados".
Furphy pediu que se poñan en contacto as persoas que teñan información relevante para este caso, que ten gran impacto no Reino Unido pola influencia que chegou a ter Brand cando estaba na cima do seu éxito neste país.

O presentador, que tivo programas de radio na BBC, sostivo sempre que todas as súas relacións sexuais foron "absolutamente consentidas" e, nos seus primeiros comentarios ao saír á luz as acusacións criticou a "corrupción mediática e a censura".