Denuncian a agresión sexual a un menor nun instituto de Almendralejo

A familia dun alumno menor de idade dun instituto de Almendralejo, en Badaxoz, denunciou a agresión sexual sufrida polo seu fillo por parte doutros alumnos tamén menores de idade e que estudan no mesmo centro.

Confirmouno a EFE a Policía Nacional, que non achega máis datos por protección dos menores.

Porén, a presidenta da Asociación Contra o Acoso Escolar de Cáceres (ACOES), Maribel Mendoza, asegura que o mozo, de 16 anos, foi vítima dunha "agresión física e sexual" por parte de catro compañeiros.

"O que si podo dicir é que foi unha agresión brutal, non te podes imaxinar", manifestou.

Segundo a presidenta da organización, os feitos ocorreron entre o 17 e o 27 de marzo e o luns ofrecerán máis detalles que están a recompilar.

"O neno aínda vai falando e sacando cousas do que se vai acordando, isto non vai ser un linchamento ao instituto nin aos profesores, pero é unha denuncia que se ten que facer visible porque se non, non se van poñer solucións nin tomar medidas", afirmou.