As memorias do duque de Sussex ameazan con toldar a coroación de Carlos III

O libro de memorias do príncipe Henrique, duque de Sussex, esta a xerar unha gran polémica no Reino Unidos antes da súa publicación oficial, prevista para o vindeiro martes.

De acordo coa prensa británica, que obtivo copias do volume, o fillo menor de Carlos III asegura que o actual rei, antes de acceder ao trono, sentía celos das súas noras Meghan e Catalina.

Segundo relata, temía que lle roubasen protagonismo, polo que se amosou remiso a apoiar economicamente os seus descendentes e as súas parellas.

Nos últimos días, os medios ingleses difundiron múltiples revelacións extraídas da biografía de Henrique e das entrevistas que concedeu a cadeas estadounidenses e á británica ITV, que a emite na súa totalidade este domingo.

Agresión e drogas

Entre outras cousas, que Guillerme o agrediu fisicamente tras manteren unha discusión sobre Meghan ou que matou 25 talibáns como piloto de helicópteros en Afganistán.

Tamén que perdeu a virxindade aos 17 anos cunha muller maior fóra dun pub cheo de xente; que consumiu cocaína aos 17 e cogomelos alucinóxenos aos 31; e que se lle conxelou o pene nunha viaxe á Antártida.

Ademais, conta que ambos os dous irmáns imploraron ao seu pai que non casase con Camila ou que nin sequera o abrazou cando lle comunicou a morte da nai.

Os analistas coinciden en que as memorias, tituladas Na sombra, ameazan con empanar a coroación de Carlos III, prevista para o mes de maio.