As paradas de Palomino e os goles de Casasola danlle ao Porriño unha vitoria de prestixio
O equipo galego sorprendeu o Bera Bera na súa pista cun axustado 21-22
O Conservas Orbe Zendal Porriño logrou unha vitoria de prestixio na pista do Bera Bera (21-22). Despois dun partido moi igualado o conxunto galego sorprendeu a un dos favoritos para lograr o título de liga e mantén a súa pelexa por entrar nos catro primeiros postos da liga regular.
Comezou moi ben o conxunto porriñés (1-4) e mantivo sempre a raia ao Bera Bera no primeiro tempo. O conxunto vasco conseguiu, como moito, un par de empates e ao descanso o resultado era de 9-10. Un parcial de 3-0 ao comezo do segundo tempo deixou ao Porriño a contrapé pero conseguiu aguantar esa saída tan forte do equipo local.
Co 17-15 parecía complicado levar o triunfo pero apareceu a arxentina Micaela Casasola para poñer un 0-3 que devolvía a vantaxe ás porriñesas. Casasola anotou seis goles case consecutivos e deixou o marcador en 19-22. O Bera Bera tivo unha reacción final (21-22) pero nos dous últimos ataques atopouse coas intervencións de Palomino, sensacional durante todo o partido.
