Aumentan as picadas de faneca nos areais galegos
Aumentan as picadas de faneca nos areais galegos
Só no mes de xullo rexistráronse máis de 700 picadas nas praias de Sanxenxo
Mide entre 15 e 50 centímetros, ocúltase baixo a area na beira do mar e a súa picada é tremendamente dolorosa. Estamos a falar das fanecas, un peixe velenoso que só durante o mes de xullo picou a máis de 700 persoas nas praias de Sanxenxo, 70 máis que o ano pasado.
Guillermo Dorado, coordinador dos socorristas de Sanxenxo, cre que este incremento de picadas débese á maior afluencia de turistas e a que a temperatura da auga é mais elevada ca en anos anteriores.
A maioría dos turistas non saben de que lles estamos a falar cando preguntamos polas fanecas e os que o saben non teñen moi claro o que deben facer se pisan unha. Uns din que hai que botarlle auga osixenada e outros que hai que somerxer a picada en auga fría.
O mellor nestes caos é pedir axuda aos socorristas. Eles recomendaranlles como actuar no caso dunha picada de faneca.
Guillermo apunta que o mellor remedio é meter a zona da picada en auga quente, como mínimo a 45 graos centígrados, durante uns 30 minutos. Di que se non temos auga quente podemos meter a zona afectada baixo a area quente para aliviar a dor.
Para non pasar por este mal momento os socorristas recomendan usar zapatillas de auga e evitar a beira do mar coa marea baixa que é cando máis picadas se rexistran. Se seguen estes sinxelos consellos poderán desfrutar dunha xornada de praia sen preocuparse polas fanecas.
