Derradeiro domingo de sol e praia nas Rías Baixas antes de saudar o outono

Aínda queda xente de vacacións, os menos, e tamén galegos que se resisten a dicir adeus á súa estación e estilo de vida favoritos. Os amantes dos areais, iso si, non madrugaron. É que entre os 16 graos da mañá cedo e os 30 graos do mediodía hai moita diferenza.     

Xente no paseo e sobre a area de Samil baixo 29 graos de temperatura e un anticiclón cegador. A auga, a dezasete graos, así que no último domingo do verán moitos metéronse no mar.

Poucos gardaron as vacacións para setembro e as localidades cubríronas algúns cidadáns do norte de Portugal, un puñado de turistas e maiormente galegos.   

Tan espectacular que moitos néganse a dicir adeus ao estío e saudar en sete días o outono. Oficialmente temos sete días ata o outono que comeza o vindeiro domingo ás 14:44 horas.

Extraoficialmente, cinco ou seis días máis, en principio, de ceo azul, sol radiante e co termómetro polos 30 graos.